‘මන්ත්‍රී විශ්‍රාම වැටුප නෑ – කැබිනට්ටුවට 30යි‘ – ප්‍රතිපත්ති මාලාව එළිදක්වමින් අනුර කුමාර කියයි
අවුරුදු 5කින් පසු පාර්ලිමේන්තු මන්ත්‍රීවරුන්ට හිමිවන විශ්‍රාම වැටුප නතර කරන බවත්, ජනාධිපතිවරු මහජන මුදලින් නඩත්තු කිරීම නතර කරන බවත්, කැබිනට් මණ්ඩලය 30කට සීමා කරන බවත් ජාතික ජනබලවේගයේ අපේක්ෂක අනුර කුමාර දිසානායක මහතා පවසයි.
කොළඹදී අද(26) ජාතික ජනබලවේගයේ ජනාධිපතිවරණ ප්‍රතිපත්ති ප්‍රකාශනය එළිදක්වමින් ඒ මහතා මේ බව සඳහන් කළේය. දේශයේ අපේක්ෂාව ලෙස නම් කර ඇති ජාතික ජන බලවේගයේ ජනාධිපතිවරණ ප්‍රතිපත්ති ප්‍රකාශනය එළිදැක්වීම අද පෙරවරුවේ කොළඹ පදනම් ආයතනයේදී සිදු කෙරුණි.
දේශපාලන පක්ෂ මැතිවරණ වේදිකාවේදී ඉදිරිපත් කරන ප්‍රතිපත්ති ප්‍රකාශන ක්‍රියාත්මක කරවීම සඳහා ඉදිරියේදී නීතිමය බැඳීමක් ඇති කරන බවද එහිදී අදහස් දක්වමින් අනුර කුමාර දිසානායක මහතා කියා සිටියේය. කිසිදු ජන කොටසක් තුළ අන්තවාදයක් ගොඩ නැගීමට ඉඩ නොදෙන බවත් එහිදී අදහස් දැක්වු අනුර කුමාර මහතා කියා සිටියේය.
ආර්ථික, සෞඛ්‍ය, අධ්‍යාපන, ප්‍රවාහනය, සංස්කෘතිය ඇතුළු ක්ෂේත්‍ර කිහිපයක් ඔස්සේ සිය ප්‍රතිපත්ති හා සැලසුම් මාලාවක් පසුගිය දින කිහිපය පුරා දිවයිනේ විවිධ ප්‍රදේශවලදී ජාතික ජනබලවේගය විසින් එළිදැක්වුණු අතර ආපේක්ෂාවේ උදානය ලෙස නම්කර ඇති මෙය ඒ සියලු ප්‍රකාශයන්ගේ එකතුවයි.
