බලු පැටවුන් දෙදෙනෙකු මතින් වාහනය පැදවූ කාන්තාවක් අත්අඩංගුවට…
බලු පැටවුන් දෙදෙනෙකු මතින් වාහනයක් ධාවනය වන අයුරු දැක්වෙන වීඩියෝවක් සති අන්තයේ සමාජ මාධ්‍ය තුළ ප්‍රචලිත වීමෙන් පසු 27 හැවිරිදි කාන්තාවක් මතුරට පොලිසිය විසින් අත්අඩංගුවට ගෙන තිබේ.
බලු පැටවුන් දෙදෙනෙකු හිතාමතා මරා දැමීම සම්බන්ධයෙන් සමාජ මාධ්‍ය ඔස්සේ ප්‍රචාරය වූ වීඩියෝවක් සම්බන්ධයෙන් මතුරට පොලිස් ස්ථානයට පෙබරවාරි 18 වැනිදා ලැබුණු පැමිණිල්ලක් මත විමර්ශන ආරම්භ කර ඇති බව පොලිසිය පවසයි.
ඒ අනුව විමර්ශනයේදී අනාවරණ වී ඇත්තේ පසුගිය පෙබරවාරි 17 වනදා පදියපලැල්ල – රිකිලිගස්කඩ මාර්ගයේ කදුරකඩේ ප්‍රදේශයේදී මෙම සිද්ධිය වාර්තා වී ඇති බවයි.
මාස 2ක් වයසැති බලු පැටවුන් දෙදෙනෙකු මෝටර් රථයක ඉදිරිපස සහ පසුපස රෝදවලට යටවී ඇති අයුරු අසළ නිවසක සවිකර තිබූ සීසීටීවී කැමරාවක සටහන්ව තිබුණා.
මෝටර් රථයේ ලියාපදිංචි අංකය පදනම් කරගෙන විමර්ශනය කර ඇති අතර එහිදී මෝටර් රථයේ හිමිකරු මතුරට ප්‍රදේශයේ පදිංචිකරුවෙකු බවත් සිද්ධිය වන අවස්ථාවේ එහි රියදුරු ලෙස කටයුතු කර ඇත්තේ හිමිකරුගේ වැඩිමහල් සහෝදරයාගේ බිරිඳ බවත් අනාවරණ වී තිබෙනවා.
මෝටර් රථය පැදවූ 27 හැවිරිදි සැකකාරිය ප්‍රකාශයක් සටහන් කර ගැනීම සඳහා පොලිස් ස්ථානයට පැමිණීමෙන් අනතුරුව අත්අඩංගුවට ගෙන ඇත.
සත්ත්ව හිංසන පනතේ වගන්තිවලට අනුවයි පොලිසිය ඇයට චෝදනා එල්ල කර තිබෙන්නේ.
සැකකරු වලපනේ මහේස්ත්‍රාත් අධිකරණයට ඉදිරිපත් කළ අතර එහිදී ඇය වරද පිළිගෙන ඇත.
පසුව ඇය රුපියල් ලක්ෂයක ශරීර ඇපයක් මත මුදා හැරිණි. 100,000 කි.
