දිනේෂ් අගමැති ධූරයෙන් ඉල්ලා අස්වන බවට පළවන වාර්තා අසත්‍ය බව අගමැති කාර්යාලය පවසයි.
අග්‍රාමාත්‍ය දිනේෂ් ගුණවර්ධන මහතා අග්‍රාමාත්‍ය ධූරයෙන් ඉල්ලා අස්වන බවට පැතිර යන වාර්තා අසත්‍ය බව අග්‍රාමාත්‍ය කාර්යාලය පවසයි.
පාර්ලිමේන්තු මන්ත්‍රී මහාචාර්ය චන්න ජයසුමන මහතා ඊයේ ප්‍රකාශ කළේ දිනේෂ් ගුණවර්ධන මහතා අග්‍රාමාත්‍ය ධූරයෙන් ඉවත් කර නැවත මහින්ද රාජපක්ෂ මහතා එම ධුරයට පත් කිරීමේ සූදානමක් පවතින බවත් ඊට සහය දෙන ලෙස ආණ්ඩු පක්ෂයේ මන්ත්‍රීවරුන් පිරිසක් නිදහස් පොදුජන පෙරමුණෙන් ඉල්ලීමක් කර ඇති බවත්ය.
අග්‍රාමාත්‍ය කාර්යාලය පැවසුවේ, අග්‍රාමාත්‍යවරයාට සිය ධුරයෙන් ඉල්ලා අස්වන ලෙස කිසිදු පාර්ශවයකින් ඉල්ලීමක් හෝ බලපෑමක් සිදු කර නොමැති බවයි.
මෙවැනි අසත්‍ය වාර්තා රජය ගෙන යන වැඩපිළිවෙළ කඩාකප්පල් කිරීමේ කුමන්ත්‍රණයක් බවද අග්‍රාමාත්‍ය කාර්යාලය වැඩිදුරටත් සඳහන් කළේය.
