චීනයේ පැතිරෙන අභිරහස් වෛරසය සම්බන්ධව සෞඛ්‍ය අමාත්‍යාංශයෙන් උපදෙස්

චීනයේ පැතිර යන කොරෝනා වෛරසයක් බවට සැලකෙන වෛරස් රෝගී තත්ත්වය හේතුවෙන් මෙරට සෞඛ්‍ය අමාත්‍යාංශය විසින් චීනයේ සංචාරය කරන ශී‍්‍ර ලාංකිකයින්ට උපදෙස් මාලාවක් නිකුත් කර තිබෙනවා.

“මනා සෞඛ්‍ය පුරුදු අනුගමනය කළ යුතු අතර ඒ සඳහා කහින විට හා කිවිසින විට ලේන්සුවකින් මුව ආවරණය කිරීම, දෑත් නිතර සබන් යොදා සෝදා පිරිසිදුව තබා ගැනීම, නිතර මුහුණ හා නාසය ඇල්ලීමෙන් වැළකීම හා ජනාකීර්ණ ස්ථානයන්හි අනවශ්‍ය ලෙස ගැවසීම අවම කිරීම සුදුසුවේ. විශේෂයෙන්ම කුඩා දරුවන්, ගර්භනී මව්වරුන් සහ වැඩිහිටියන් අධික තදබදය පවතින ජනාකීර්ණ ප‍්‍රදේශවල අනවශ්‍ය ලෙස ගැවසීම සහ ගමන්බිමන් යාම අවම කිරීම මගින් මෙම රෝගය පැතිරීම පාලනය කරගත හැකිය.”

චීනය තුල පැතිර යමින් ඇති මෙම අභිරහස් වෛරසයෙන් උහාන් ප්‍රාන්තයේ දෙදෙනෙක් මියගොස් ඇති අතර එයට ගොදුරු වී ඇති පිරිස 45 පමණ බවයි බලධාරින් ප්‍රකාශ කර සිටින්නේ. කෙසේ වෙතත් ලන්ඩනයේ ඉම්පීරියල් කොලේජ් විසින් කරන ලද අධ්‍යයනයකින් හෙළි වී ඇත්තේ ජනවාරි 12 වන විටත් පුද්ගලයින් 1,723 ක් ආසාදනය වී ඇති බවයි. මිට අමතරව මේ වන විට තායිලන්තයෙන් රෝගීන් දෙදෙනෙක් හා ජපානයෙන් එක් රෝගියකුද වාර්තා වී තිබෙනවා.

මෙරට සෞඛ්‍ය අමාත්‍යාංශය පැවසුවේ එම තත්ත්වය පිළිබද ලෝක සෞඛ්‍ය සංවිධානය නිකුත් කරන දැනුම්දීම් පිළිබදව අවදානයෙන් පසු වන බවයි. මේ පිළිබද දැඩි සැලකිල්ලකින් පසුවන බවත් එවැනි අවදානම් තත්ත්වයක් මතුවුවහොත් ඊට කඩිනම් කි‍්‍රයාමාර්ග ගැනීමට කටයුතු කරන බවද සෞඛ්‍ය අමාත්‍යාංශය ප‍්‍රකාශ කළා.

එමෙන්ම අමෙරිකාව සහ ඉන්දියාවද චීනයේ සංචාරය කිරීමේදී සැලකිලිමත් වන ලෙස සිය වැසියන්ට අනතුරු ඇගවීම් නිකුත් කර තිබෙන අතර අමෙරිකානු ගුවන් තොටුපල 3 කදි චීන සංචාරකයින් දැඩි පරික්ෂාවකට ලක් කෙරෙනවා. එමෙන්ම සිංගප්පූරුව සහ හොංකොං රාජ්‍යද චීනයේ උහාන් ප‍්‍රදේශයේ සිට පැමිණෙන සංචාරකයින් දැඩි පරික්ෂාවකට ලක් කෙරෙන බවට වාර්තා වෙනවා.

වෛරසයේ ව්‍යාප්තිය සම්බන්ධයෙන් අවධානයෙන් පසුවන ලෙසයි ලෝක සෞඛ්‍ය සංවිධානය ආසියානු රටවලට අනතුරු අගවා ඇත්තේ.

Leave a Reply

Your email address will not be published.