අමෙරිකානු පුරවැසිභාවය ඉවත් කළ පුද්ගලයින්ගේ මේ වනවිට අලුතින්ම නිකුත් කර ඇති නාම ලේඛනයේ ශ‍්‍රී ලංකා පොදුජන පෙරමුණේ ජනාධිපති ධූර අපේක්ෂක ගෝඨාභය රාජපක්ෂගේ නම ඇතුළත්ව නොමැති බවට අසත්‍ය සහ මඩ ප්‍රචාරයක් සිදුවෙමින් ඇති බව පාර්ලිමේන්තු මන්තී‍්‍ර නාමල් රාජපක්ෂ මහතා ට්විටර් පණිවිඩයක් තබමින් සඳහන් කරයි.
එහි දැක්වෙන්නේ ශ‍්‍රී ලංකා පොදුජන පෙරමුණේ ජනාධිපති ධූර අපේක්ෂක ගෝඨාභය රාජපක්ෂගේ අමෙරිකානු පුරවැසිභාවය ඉවත් කළ බවට අමෙරිකානු රජය නිකුත් කළ සහතිකයයි. එහිදී නාමල් රාජපක්ෂ මන්තී‍්‍රවරයා සඳහන් කර ඇත්තේ ඉදිරි දින කිහිපයේදී ජනතාව මුලා කිරීමට එක්සත් ජාතික පක්ෂයට දැන් තවත් බොරුවක් සොයා ගැනීමට සිදුවනු ඇති බවයි.
අමෙරිකානු පුරවැසිභාවය ඉවත් කළ පුද්ගලයින්ගේ නාම ලේඛනයේ ශ‍්‍රී ලංකා පොදුජන පෙරමුණේ ජනාධිපති ධූර අපේක්ෂක ගෝඨාභය රාජපක්ෂගේ නම ඇතුළත්ව නොමැති බව අමාත්‍ය හරීන් ප‍්‍රනාන්දු ඊයේ(9) ට්විටර් සටහනක් තබමින් කරුණු දක්වා තිබූ අතර එහි දැක්වුණේ ගෝඨාභය රාජපක්ෂ තවදුරටත් අමෙරිකානු පුරවැසියකු වන බවයි. ඒ අනුව ගෝඨාභය රාජපක්ෂ ජනාධිපතිධූරයට පත්වුවහොත්, ඔහුට එම ධූරය දැරීමට නොහැකි වන බවයි හරීන් ප‍්‍රනාන්දු අමාත්‍යවරයා සිය ට්විටර් පණිවිඩය මගින් දක්වා තිබිණි..
කෙසේ වෙතත් අමාත්‍ය හරීන් ප‍්‍රනාන්දු විසින් සිය ට්විටර් පණිවිඩය හරහා පළ කර ඇත්තේ ශ‍්‍රී ලංකා පොදුජන පෙරමුණේ ජනාධිපති ධූර අපේක්ෂක ගෝඨාභය රාජපක්ෂගේ අමෙරිකානු විදෙස් ගමන් බලපත‍්‍රයේ මුල් පිටුව පමණක් බවත් ජනාධිපති ධූර අපේක්ෂක ගෝඨාභය රාජපක්ෂගේ අමෙරිකානු විදෙස් ගමන් බලපත‍්‍රය අවලංගු කරමින් අමෙරිකානු රජය තැබූ මුද්‍රාව ඇතුළත් පිටුව අමාත්‍ය හරීන් ප‍්‍රනාන්දු සිය ට්විටර් සටහනට එක්කර නැති බවත් නාමල් රාජපක්ෂ මහතා පෙන්වා දේ.
ජනාධිපති ධූර අපේක්ෂක ගෝඨාභය රාජපක්ෂගේ අමෙරිකානු විදෙස් ගමන් බලපත‍්‍රය අවලංගු කළ බව දැක්වෙන එම පිටුව ඇතුළු එහි සියලු තොරතුරු පහතින් දැක්වේ.
(ඡායාරූප – නෙත් නිව්ස් ඇසුරිනි)
