කොළඹ ඉන්දීය වීසා අයදුම් කිරීමේ මධ්‍යස්ථානයට කඩා වැදුණු 5 දෙනෙකු අත්අඩංගුවට…
කොළඹ, පිලිප් ගුණවර්ධන මාවතේ පිහිටි ඉන්දීය වීසා අයදුම් කිරීමේ මධ්‍යස්ථානයේ වීසා මධ්‍යස්ථානයේ සිදුවූ සොරකම සම්බන්ධයෙන් එහි සනීපාරක්ෂක සේවිකාවක් ඇතුළු සැකකරුවන් 5 දෙනෙකු පසුගියදා අත්අඩංගුවට ගෙන තිබෙනවා.
කොළඹ පිහිටි ඉන්දීය මහ කොමසාරිස් කාර්යාලය ආරක්ෂක හේතූන් මත පසුගිය සතියේ දින කිහිපයකට පෙබරවාරි 15 වැනිදා වසා දමා සඳුදා යළි විවෘත කෙරිණි.
පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී නිහාල් තල්දූව මහතා පැවසුවේ, පසුගිය පෙබරවාරි 14 වැනි දින වීසා මධ්‍යස්ථානයට ඇතුළු වූ කොල්ලකරුවන් පිරිසක් උපකරණ කිහිපයක් සොරකම් කර ඇති බව ය.
සැකකරුවන් සන්තකයේ තිබී රුපියල් ලක්ෂ තුනක් වටිනා ලැප්ටොප් පරිගණකයක්, ඩීවීආර් එකක්, කැමරාවක් සහ අයි-පොඩ් එකක් පොලිසිය විසින් සොයාගෙන තිබේ. ඉන්දීය වීසා අයදුම් කිරීමේ මධ්‍යස්ථානයේ පිහිටි රටේ කළමනාකරුගේ කාර්යාලයට කොල්ලකරුවන් කඩා වැදී ඇති බවයි වාර්තා වුණේ.
කෙසේ වෙතත් සැකකරුවන් කිසියම් උපකරණයක් සොරකම් කිරීමටද එසේත් නැතිනම් වෙනත් කටයුත්තක් සඳහා කඩා පැමිණ තිබේද යන්න පිළිබඳව පරීක්ෂණ අඛණ්ඩව සිදු කරන බව එම ප්‍රකාශකයා පැවසීය.
වැල්ලවත්ත ප්‍රදේශයේදී 53 හැවිරිදි සැකකරුවන් දෙදෙනෙකු අත්අඩංගුවට ගෙන ඇති අතර කිරුළපන සහ තිඹිරිගස්යාය ප්‍රදේශයේදී 49 සහ 54 හැවිරිදි සැකකරුවන් දෙදෙනෙකු අත්අඩංගුවට ගෙන තිබෙනවා.
ග්‍රෑන්ඩ් පාස් ප්‍රදේශයේ පදිංචි 63 හැවිරිදි කාන්තා සනීපාරක්ෂක සේවිකාව වීසා මධ්‍යස්ථානය තුළ සේප්පුවක් තිබූ බැවින් එම මධ්‍යස්ථානයට ඇතුළු වන ලෙස සැකකරුවන්ට තොරතුරු ලබා දෙන්නට ඇති බව ඔහු පැවසීය.
විමර්ශන අවසන් වූ පසු සැකකරුවන් අධිකරණයට ඉදිරිපත් කරන බව එම ප්‍රකාශකයා සඳහන් කළේය.
