වනජීවී නිලධාරීන් සහ පශු වෛද්‍ය කණ්ඩායම් ජීවිතය බේරාගැනීමට දැඩි උත්සාහයක නිරත වුවද, වෙඩි වැදීමෙන් බරපතළ තුවාල ලබා සිටි කවන්තිස්ස ඇතා මියයෑම පිළිබඳව රජය දැඩි කනගාටුවට පත්ව සිටින බව අග්‍රාමාත්‍ය හරිනි අමරසූරිය මහත්මිය ප්‍රකාශ කළාය.
කොළඹදී පැවති 2026 ජනාධිපති පරිසර සම්මාන උළෙල අමතමින් අග්‍රාමාත්‍යවරිය කියා සිටියේ මෙවැනි ඛේදවාචකයක් යළි කිසිසේත් සිදු නොවිය යුතු බවයි.
පරිසර අපරාධවලට වගකිව යුතු පුද්ගලයන්ගේ තනතුර, ධනය හෝ සබඳතා නොසලකා ඔවුන්ට එරෙහිව පරිසර නීති දැඩිව ක්‍රියාත්මක කරන බවද ඇය අවධාරණය කළාය.
“කවන්තිස්ස ඇතාට සිදුවූ ආකාරයේ ඛේදවාචක නැවත සිදුවීමට අපට ඉඩ දිය නොහැකියි. පුද්ගලයෙකුගේ තනතුර, ධනය හෝ සබඳතා මත පරිසර නීතිවලට බලපෑම් කිරීමට ඉඩ දිය නොහැකියි. නීතිය සැමට එකසේ ක්‍රියාත්මක කරනවා,” යැයි අග්‍රාමාත්‍යවරිය පැවසුවාය.
කවන්තිස්ස ඇතාගේ ජීවිතය බේරාගැනීම සඳහා වනජීවී නිලධාරීන් සහ පශු වෛද්‍ය කණ්ඩායම් සැලකිය යුතු උත්සාහයක් දැරූ බවද ඇය සඳහන් කළාය. එහෙත් තුවාලවල බරපතළකම සහ ඒ හේතුවෙන් ඇති වූ ආසාදන නිසා ඇතාගේ ජීවිතය බේරාගැනීමට නොහැකි වූ බව ඇය පැවසුවාය.
ඉදිරියේදී මෙවැනි සිදුවීම් වළක්වාගැනීම සඳහා වනජීවී පශු වෛද්‍ය සේවා සහ පශු වෛද්‍ය අධ්‍යාපනය තවදුරටත් ශක්තිමත් කරන බවද අග්‍රාමාත්‍යවරිය වැඩිදුරටත් සඳහන් කළාය.
අලි-මිනිස් ගැටුමට විසඳුම් ලබාදීම සඳහා ගෙන ඇති පියවර පැහැදිලි කරමින් ඇය කියා සිටියේ හෙක්ටයාර 71,900කට ආසන්න භූමි ප්‍රමාණයක් ආවරණය වන පරිදි වනාන්තර ප්‍රදේශ 113ක් රක්ෂිත ලෙස නම් කර ඇති බවයි.
අලින්ට ගමන් කිරීමට පහසුකම් සැලසීම සඳහා අලිමංකඩ තුනක්ද ස්ථාපිත කරමින් පවතින අතර, ඒ සමඟම අලි කළමනාකරණය සඳහා වෙන්වූ රක්ෂිතයක්ද ඇති කිරීමට කටයුතු කරමින් සිටින බව ඇය පැවසුවාය.
වනජීවී සංරක්ෂණ දෙපාර්තමේන්තුවේ කටයුතු ශක්තිමත් කිරීම සඳහා රජය පිකප් රථ 100ක්, යතුරුපැදි 185ක් සහ ට්‍රැක්ටර් නවයක් ලබාදී තිබේ. අලි වැට නඩත්තු කිරීම සඳහා අලි වැට සහායකයන් 3,500ක් සහ සිවිල් ආරක්ෂක දෙපාර්තමේන්තුවේ සාමාජිකයන් 5,000ක්ද යොදවා ඇති බව අග්‍රාමාත්‍යවරිය සඳහන් කළාය.
වසර 26කට පසු ජාතික පාරිසරික පනත සංශෝධනය කිරීමට පියවර ගෙන ඇති බවද ඇය නිවේදනය කළාය. පරිසර අමාත්‍යාංශයට නව නිලධාරීන් 1,600කට වැඩි පිරිසක් බඳවා ගැනීමේ කටයුතුද සිදු කෙරෙමින් පවතී.
තිරසාර සංවර්ධනයේ වැදගත්කම අවධාරණය කළ අග්‍රාමාත්‍යවරිය පවසා සිටියේ පරිසර සංරක්ෂණය රජයේ ප්‍රතිපත්තිවලට මෙන්ම පුරවැසියන්ගේ දෛනික ජීවිතයටද ඇතුළත් කළ යුතු බවයි.
“පරිසරය විනාශ කිරීමේ වියදමින් අත්කරගන්නා සංවර්ධනය කිසිසේත් තිරසාර සංවර්ධනයක් ලෙස සැලකිය නොහැකියි,” යැයි ඇය පැවසුවාය.
