ඉන්දියාව හමුවේ දකුණු අප්‍රිකාවට අන්ත පරාජයක්
ඉන්දියාව සහ සංචාරක දකුණු අප්‍රිකා කණ්ඩායම අතර පැවැති තරග 3කින් යුතු ටෙස්ට් තරගාවලිය 3-0ක් ලෙස ජයගැනීමට ඉන්දීය කණ්ඩායම අද(22) සමත් විය. ඒ අවසන් ටෙස්ට් තරගය ඉනිමකින් සහ ලකුණු 202කින් ජයගනිමිනි.
තරගයේ පළමුව පන්දුවට පහරදුන් ඉන්දීය කණ්ඩායම කඩුලු 9ක් දැවී ලකුණු 497ක් ලබා සිටියදී සිය ඉනිම අත්හිටවූ අතර දකුණු අප්‍රිකාව සිය පළමු ඉනිමට සියලු දෙනා දැවී ලබාගත්තේ ලකුණු 162ක් පමණි. ඉනිමක පරාජයෙන් බේරීමට 335ක ඉලක්කයක් කරා ගිය දකුණු අප්‍රිකාව දෙවැනි ඉනිමට සියලු දෙනා දැවී ලබාගත්තේ ලකුණු 133ක් පමණි. ඉන්දීය කණ්ඩායම වෙනුවෙන් මෙම තරගයේදී රෝහිත් ශර්මා සිය පළමු ද්විත්ව ශතකය වාර්තා කළ අතර තරගාවලිය පුරා පිත්තෙන් විශිෂ්ට දක්ෂතා දැක්වූ ඔහු තරගයේ වීරයා සහ තරගාවලියේ වීරයා සම්මානවලින් පිදුම් ලැබීය.
දෙරට අතර පළමු ටෙස්ට් තරගයෙන් ඉන්දියාව ලකුණු 203ක ජයක් ලැබූ අතර දෙවැනි ටෙස්ට් තරගයේදී ඉනිමකින් සහ ලකුණු 137කින් ජය ලැබීය. ඒ අනුව දකුණු අප්‍රිකාවට අන්ත පරාජයක් මෙවර ටෙස්ට් තරගාවලියේදී හිමිවූ අතර ලෝක ටෙස්ට් ශූරතාවලියට අයත් මෙම තරගාවලියේ ජයත් සමග ඉන්දියාව පෙරමුණේ පසුවේ.
