ඉදිකිරීම් ක්ෂේත්රය මුහුණ දෙන ප්‍රධාන ගැටලු අවධාරණයට…
ආර්ථික අර්බුදය හමුවේ ඉදිකිරීම් ක්ෂේත්‍රයට එල්ල වී ඇති ගැටලු පිළිබඳව ජාතික සභාවේ අනුකාරක සභාව සාකච්ඡාවක් පවත්වා තිබේ.
පාර්ලිමේන්තුවේ ප්‍රකාශයකට අනුව, ඉදිකිරීම් ක්ෂේත්රය මුහුණ දී සිටින ගැටලු පිළිබඳව සාකච්ඡා කිරීම සඳහා ජාතික සභාවේ ආර්ථික ස්ථාවරත්වයට අදාළ කෙටි හා මධ්‍ය කාලීන වැඩසටහන් හඳුනාගැනීමේ අනුකාරක සභාව පාර්ලිමේන්තු මන්ත්‍රී පාඨලී චම්පික රණවක මහතාගේ ප්‍රධානත්වයෙන් ඊයේ (11) රැස්විය.
මෙම සාකච්ඡාව සඳහා ශ්‍රී ලංකාවේ ඉදිකිරීම් ක්ෂේත්‍රයට සම්බන්ධ රාජ්‍ය සහ පෞද්ගලික අංශය නියෝජනය කරන පාර්ශව කිහිපයක නියෝජිතයින් සහභාගී වූ අතර එම ක්ෂේත්‍රයේ පවතින ගැටළු සම්බන්ධයෙන් ඔවුන්ගේ අදහස් ලබා ගන්නා ලදී.
ඉදිකිරීම් කර්මාන්තය ආශ්‍රිතව සෘජු රැකියා 650,000ක් සහ වක්‍ර රැකියා 700,000ක් පමණ පවතින බව පැමිණ සිටි නියෝජිතයෝ පෙන්වා දුන්හ. නමුත් මේ වන විට ඉදිකිරීම් ක්ෂේත්රය කඩා වැටී ඇති බවත් මේ හේතුවෙන් කම්කරුවන් අර්බුදයකට පත්ව ඇති බවත් ඔවුන් පෙන්වා දුන්නා.
තවද, දැනට ඉදිකර ඇති මහල් නිවාස, කාර්යාල වැනි ඉදිකිරීම් අලෙවි කිරීම ද දුෂ්කරතාවට පත්ව ඇති බව එම පාර්ශ්ව පෙන්වා දුන්නා.
එමෙන්ම මෙතෙක් ඉදිකර ඇති ඉදිකිරීම්වලින් කොටසක් රජය විසින් නොගෙවීම හේතුවෙන් බැංකු ණය ගෙවීමට අපහසුතා ඇති විශාල පිරිසක් සිටින බවද පැමිණ සිටි පාර්ශ්ව පෙන්වා දුන්නා.
ආර්ථික අර්බුදය හේතුවෙන් ඉදිකිරීම් ක්ෂේත්‍රයට සම්බන්ධ පුද්ගලයන් රට හැර යාමේ ප්‍රවණතාවක් ද මතුව ඇති බවද මෙහිදී අනාවරණය විය.
මුදල් අවශ්‍ය විසඳුම්, මුදල් අවශ්‍ය නොවන විසඳුම් සහ නීතිමය විසඳුම් වෙන් වෙන් වශයෙන් හඳුනාගෙන ක්‍රියාත්මක නොකළහොත් රටේ ඉංජිනේරු ක්ෂේත්රය විශාල කඩාවැටීමකට ලක්වන බව පාර්ලිමේන්තු මන්ත්‍රී රණවක මහතා පැවසීය.
ඒ සම්බන්ධයෙන් පාර්ලිමේන්තුවට සහ රජයට යෝජනා කඩිනමින් ඉදිරිපත් කිරීමට බලාපොරොත්තු වන බවද ඒ මහතා වැඩිදුරටත් පැවසීය.
