ආපදා අවස්ථාවලදී කඩිනම් ප්රතිචාර දැක්වීමේ හැකියාව තවදුරටත් ශක්තිමත් කිරීමේ අරමුණින් ශ්රී ලංකාව සහ ඇමෙරිකා එක්සත් ජනපදය එක්ව පවත්වන “Atlas Angel II” ඒකාබද්ධ පුහුණු අභ්යාසය අද ආරම්භ කර තිබේ.
සැප්තැම්බර් 4 දක්වා පැවැත්වෙන මෙම පුහුණු අභ්යාසයට ශ්රී ලංකා සහ ඇමෙරිකානු හමුදා සාමාජිකයන් මෙන්ම විවිධ ක්ෂේත්රවල විශේෂඥයන් ද එක්ව සිටිති.
C-130 ගුවන් යානා නඩත්තුව, නාගරික සෙවීම් හා මුදාගැනීම්, ආපදා කළමනාකරණ පද්ධති, ඉදිකිරීම් ඉංජිනේරු කටයුතු, නායයෑම්වලට ප්රතිචාර දැක්වීම සහ රසායනික, ජීව විද්යාත්මක, විකිරණශීලී, න්යෂ්ටික හා පුපුරන ද්රව්ය ආශ්රිත අවදානම් කළමනාකරණය ඇතුළු අංශ රැසක් යටතේ පුහුණුව මෙහිදී ලබාදීමට නියමිතය.
මෙම අභ්යාසයේ ප්රධාන කටයුතු කටුනායක ශ්රී ලංකා ගුවන් හමුදා කඳවුර සහ මහනුවර ආශ්රිතව පැවැත්වෙන අතර, මොන්ටානා ජාතික ආරක්ෂක බලකාය, ශ්රී ලංකා ගුවන් හමුදාව සහ ඇමෙරිකානු පැසිෆික් ගුවන් හමුදා බලකාය ඊට සහභාගී වෙති. එක්සත් රාජධානිය සහ බංග්ලාදේශය නියෝජනය කරමින් නිරීක්ෂකයන් පිරිසක්ද අභ්යාසයට එක්ව සිටිති.
ශ්රී ලංකාවේ ඇමෙරිකානු තානාපති එරික් මේයර් මහතා සඳහන් කළේ “Atlas Angel” වැඩසටහන දෙරට අතර පවතින සහයෝගීතාව ප්රායෝගිකව ක්රියාත්මක වන ආකාරය පෙන්වන අවස්ථාවක් බවයි.
ඇමෙරිකානුවන් සහ ශ්රී ලාංකිකයන් එකට පුහුණුව ලබමින්, දැනුම හුවමාරු කරගනිමින් සහ එකිනෙකාගෙන් ඉගෙන ගනිමින් ආපදා අවස්ථාවලදී ජීවිත සහ ජනතාවගේ ජීවනෝපායන් ආරක්ෂා කිරීමට අවශ්ය සූදානම ශක්තිමත් කරන බවද ඔහු පෙන්වා දී තිබේ.
ශ්රී ලංකා ගුවන් හමුදාපති එයාර් මාර්ෂල් බන්දු එදිරිසිංහ මහතා පැවසුවේ ස්වාභාවික ආපදා කිසිදු දේශ සීමාවකට සීමා නොවන බවයි.
“Atlas Angel II” හරහා මානුෂීය සහ ආපදා සහන මෙහෙයුම් පිළිබඳ සංකල්පය නව මට්ටමකට ගෙන යමින්, ජනතාවට අවශ්ය සහාය ලබාදීම සඳහා රටවල් කිහිපයක් එක්ව කටයුතු කරන බවද ඔහු සඳහන් කළේය.
මෙම අභ්යාසය දෙරට අතර 2021 වසරේදී ඇමෙරිකානු රාජ්ය හවුල්කාරීත්ව වැඩසටහන යටතේ මොන්ටානා ජාතික ආරක්ෂක බලකාය සහ ශ්රී ලංකාව අතර ආරම්භ වූ සහයෝගීතාව මත ගොඩනැගී තිබේ.
2025 නොවැම්බර් මාසයේදී අත්සන් කළ අවබෝධතා ගිවිසුමක් මගින් ආපදා ප්රතිචාර, ගුවන් සේවා සහ සමුද්රීය ආරක්ෂාව ඇතුළු ක්ෂේත්රවල සහයෝගීතාව තවදුරටත් විධිමත් කර තිබේ.
“Atlas Angel II” සඳහා සංස්කෘතික හුවමාරු වැඩසටහන් ද ඇතුළත් වන අතර, ඇමෙරිකානු පැසිෆික් ගුවන් හමුදා සංගීත කණ්ඩායමේ සංගීතඥයන් ශ්රී ලාංකික සංගීතඥයන් සමඟ එක්ව ප්රසංග පැවැත්වීමට නියමිතය. එමඟින් වෘත්තීය සහ ජනතාව අතර සබඳතාද තවදුරටත් ශක්තිමත් කිරීමට අපේක්ෂා කෙරේ.
ඇමෙරිකානු තානාපති කාර්යාලය පෙන්වා දෙන්නේ ආපදා ඇතිවීමට පෙර රටවල් අතර ඒකාබද්ධ පුහුණුව සහ සම්බන්ධීකරණය සිදු කිරීමෙන් සැබෑ ආපදා අවස්ථාවකදී වඩාත් කාර්යක්ෂමව කටයුතු කිරීමට හැකි වන බවයි.
2025 දෙසැම්බර් මාසයේදී ඇති වූ ඩිට්වා සුළි කුණාටුවෙන් පසු ශ්රී ලංකාවට අත්යවශ්ය සහන ද්රව්ය C-130J ගුවන් යානා මගින් ඒකාබද්ධව ප්රවාහනය කළ අවස්ථාව එවැනි සහයෝගීතාවයකට උදාහරණයක් ලෙස තානාපති කාර්යාලය පෙන්වා දී තිබේ.
