අයහපත් කාලගුණයෙන් පුද්ගලයින් 5,200කට වැඩි පිරිසක් පීඩාවට
දිවයින පුරා පවතින අයහපත් කාලගුණික තත්ත්වය හේතුවෙන් පවුල් 1,582ක පුද්ගලයින් 5,267 දෙනෙකු පීඩාවට පත්ව සිටින බව ආපදා කළමනාකරණ මධ්‍යස්ථානය පවසයි.
නිවේදනයක් නිකුත් කරමින් ආපදා කළමනාකරණ මධ්‍යස්ථානය කියා සිටියේ දිස්ත්‍රික්ක කිහිපයකින් බලපෑම් වාර්තා වී ඇති අතර ප්‍රාදේශීය ලේකම් කොට්ඨාස 66 ක ජනතාව පීඩාවට පත්ව ඇති බවයි.
මේ අතර අයහපත් කාලගුණය හේතුවෙන් නිවාස 200කට අර්ධ හානි සිදුව ඇති අතර රත්නපුර දිස්ත්‍රික්කයේ එක් නිවසක් සම්පූර්ණයෙන්ම විනාශ වී තිබෙනවා.
අර්ධ හානියට පත් වැඩිම නිවාස සංඛ්‍යාව කළුතර දිස්ත්‍රික්කයෙන් වාර්තා වී ඇති අතර, ඉන් නිවාස 90ක් විපතට පත් විය.
ඩීඑම්සී විසින් නිකුත් කරන ලද දිස්ත්‍රික් මට්ටමේ දත්ත වලට අනුව, මඩකලපුව සහ ගම්පහ දිස්ත්‍රික්කවල නිවාස 25 බැගින් අර්ධ හානියට පත්ව ඇති අතර රත්නපුරයේ නිවාස 22 කට සහ ගාල්ලේ නිවාස 14 කට හානි සිදුවී ඇත.
මීට අමතරව, කොළඹ සහ මන්නාරම දිස්ත්‍රික්කවල නිවාස 5 බැගින් අර්ධ හානි සිදුව ඇති අතර, මොනරාගල සහ යාපනය දිස්ත්‍රික්කවල නිවාස 4 බැගින් ද හානි සිදුව තිබේ.
අඩුම හානිය හම්බන්තොට, අනුරාධපුර සහ ත්‍රිකුණාමලය දිස්ත්‍රික්කවලින් වාර්තා වී ඇති අතර, සෑම දිස්ත්‍රික්කයකම නිවාස දෙකකට අර්ධ හානි සිදුව ඇති බව ආපදා කළමනාකරණ මධ්‍යස්ථානය පවසයි.
