රථවාහන පොලිසියෙන් යැයි හඟවමින් රථවාහන වැරදි සඳහා අන්තර්ජාලය ඔස්සේ දඩ මුදල් ගෙවන ලෙස දැනුම් දෙමින් යවන වංචනික පණිවිඩවලට හසු නොවන ලෙස ශ්රී ලංකා පොලිසිය රියැදුරන්ට අනතුරු අඟවා තිබේ.
රථවාහන පාලන හා මාර්ග ආරක්ෂණ පරාසයේ නියෝජ්ය පොලිස්පති සෙනාධීර මහතා සඳහන් කළේ, රථවාහන වරදක් සිදු කර ඇති බවත්, නියමිත කාලසීමාවක් තුළ අන්තර්ජාලය ඔස්සේ දඩ මුදල ගෙවිය යුතු බවත් සඳහන් කරමින් පණිවිඩ සංසරණය වන බවයි.
දින කිහිපයක් ඇතුළත දඩ මුදල නොගෙවුවහොත් එය වැඩි වන බවත්, නීතිමය ක්රියාමාර්ගවලට යොමු කරන බවත් එම පණිවිඩවලින් තර්ජනය කරන බව පොලිසිය පවසයි.
පසුව ලබන්නන් වංචනික වෙබ් අඩවි වෙත යොමු කරමින්, ඔවුන්ගේ පෞද්ගලික තොරතුරු සහ බැංකු කාඩ්පත් තොරතුරු ඇතුළත් කරන ලෙස ඉල්ලා සිටින බවද පොලිසිය සඳහන් කරයි.
මෙවැනි සබැඳි හරහා සිය බැංකු තොරතුරු ඇතුළත් කිරීමෙන් පසු තම ගිණුම්වලින් මුදල් අහිමි වූ පුද්ගලයන් පිළිබඳ පැමිණිලි පොලිසියට ලැබී ඇති බව නියෝජ්ය පොලිස්පති සෙනාධීර මහතා පැවසීය.
රථවාහන දඩ ගෙවීම සඳහා වෙබ් අඩවි වෙත යොමු කරමින් ශ්රී ලංකා රථවාහන පොලිසිය කිසිදු පණිවිඩයක් නොයවන බව ඔහු අවධාරණය කළේය.
නියෝජ්ය පොලිස්පතිවරයාට අනුව, මේ වන විට රථවාහන දඩ මුදල් අන්තර්ජාලය ඔස්සේ ගෙවීම සඳහා රජය විසින් අනුමත කර ඇති එකම ක්රමවේදය GovPay වන අතර, අදාළ රථවාහන වරද සම්බන්ධයෙන් පොලිස් නිලධාරියෙකු ලබාදෙන තොරතුරු භාවිතයෙන් එම ගෙවීම සිදු කළ හැකිය.
“ශ්රී ලංකා රථවාහන පොලිසිය විසින් එවන රථවාහන දඩ ගෙවීම සඳහා වෙනම වෙබ් අඩවියක් නැහැ” යනුවෙන් සෙනාධීර මහතා පැවසීය.
එබැවින් සැක සහිත සබැඳි මත ක්ලික් නොකරන ලෙසත්, බැංකු තොරතුරු ඇතුළු රහස්ය තොරතුරු කිසිදු අවස්ථාවක හෙළි නොකරන ලෙසත් ඔහු ජනතාවගෙන් ඉල්ලා සිටියේය.
මෙම වංචාවට හසුවී මුදල් අහිමි වූ පුද්ගලයන්ට ඒ සම්බන්ධයෙන් විමර්ශනයක් සඳහා ළඟම ඇති පොලිස් ස්ථානයට පැමිණිල්ලක් ඉදිරිපත් කරන ලෙසද උපදෙස් ලබාදී තිබේ.
වහාම රථවාහන දඩ ගෙවන ලෙස ඉල්ලා සබැඳි සහිතව ලැබෙන අනපේක්ෂිත පණිවිඩ නොසලකා හරින ලෙස පොලිසිය රියැදුරන්ගෙන් වැඩිදුරටත් ඉල්ලා සිටී.
