අධික වර්ෂාව හේතුවෙන් දිවයිනේ ප්රධාන ගංගා කිහිපයක ජල මට්ටම් ඉහළ ගොස් ඇති අතර, නවතම ගංගා ජල මට්ටම් නිරීක්ෂණ දත්ත අනුව මහවැලි ගඟ පේරාදෙණිය සහ නාවලපිටිය ප්රදේශවලදී ප්රධාන ගංවතුර මට්ටම ඉක්මවා තිබේ.
පස්වරු 3.30ට නිකුත් කළ දත්ත අනුව, පේරාදෙණිය ජල මිනුම් ස්ථානයේ මහවැලි ගඟේ ජල මට්ටම මීටර් 9.20ක් ලෙස වාර්තා වී ඇති අතර, එහි ප්රධාන ගංවතුර මට්ටම මීටර් 9කි.
නාවලපිටිය ජල මිනුම් ස්ථානයේ ජල මට්ටම මීටර් 7.85ක් ලෙස වාර්තා වී ඇති අතර, එහි ප්රධාන ගංවතුර මට්ටම මීටර් 6කි.
මේ අතර, තවත් ප්රදේශ කිහිපයක සුළු ගංවතුර තත්ත්වයක් වාර්තා වී තිබේ. ඒ අනුව කිතුල්ගල ප්රදේශයේ කැලණි ගඟ, හොලොම්බුව ප්රදේශයේ ගුරුගොඩ ඔය, දැරණියගල ප්රදේශයේ සීතාවක ගඟ, නෝර්වුඩ් ප්රදේශයේ කැහැල්ගමු ඔය සහ රත්නපුර ප්රදේශයේ කළු ගඟ යන ජල මාර්ගවල සුළු ගංවතුර තත්ත්වයක් පවතින බව වාර්තා වේ.
සමහර ප්රදේශවල ජල මට්ටම් පහත වැටීමට පටන්ගෙන ඇති අතර, තවත් ස්ථානවල ජල මට්ටම් තවදුරටත් ඉහළ යමින් පවතින බව බලධාරීහු සඳහන් කළහ.
අඛණ්ඩව පවතින අධික වර්ෂාව හේතුවෙන් ගංගා ආශ්රිත සහ පහත්බිම් ප්රදේශවල ජනතාව අවධානයෙන් පසුවන ලෙසද බලධාරීහු වැඩිදුරටත් දැනුම් දෙති.
