“බෝ නොවන රෝග පරදවන්න ක්‍රීඩා සංස්කෘතියක් හදන්න; ඇවිදින මංතීරුවලින් උපරිම වැඩ ගන්න”: 2027 අයවැයට පෙර ජනපති අනුර කුමාරගෙන් විශේෂ උපදෙස් මාලාවක්
ජාත්‍යන්තර ජයග්‍රහණ අත්කර ගත හැකි දක්ෂ ක්‍රීඩක ක්‍රීඩිකාවන් බිහිකිරීමට විධිමත් උපායමාර්ගික සැලසුම් සකස් කරන ලෙසත්, නිරෝගී ජනගහනයක් සහ ශක්තිමත් ක්‍රීඩා සංස්කෘතියක් ගොඩනැගීම උදෙසා දිවයින පුරා ක්‍රීඩාව ප්‍රවර්ධනය කිරීමට පියවර ගන්නා ලෙසත් ජනාධිපති අනුර කුමාර දිසානායක මහතා ක්‍රීඩා අමාත්‍යාංශයේ නිලධාරීන්ට උපදෙස් ලබා දී තිබේ.
තරුණ කටයුතු හා ක්‍රීඩා අමාත්‍යාංශයේ 2027 වසර සඳහා වන අයවැය යෝජනා පිළිබඳව සාකච්ඡා කිරීම වෙනුවෙන් ඊයේ (29) පෙරවරුවේ ජනාධිපති ලේකම් කාර්යාලයේදී පැවති විශේෂ හමුවේදී ජනාධිපතිවරයා මෙම උපදෙස් ලබා දුන්නේය.
වර්තමානයේ මෙරට සෞඛ්‍ය ක්ෂේත්‍රය මුහුණ දෙන ප්‍රධානතම අභියෝගයක් බවට පත්ව ඇති බෝ නොවන රෝග (NCDs) මර්දනය කිරීම සඳහා ක්‍රීඩාව සහ ශාරීරික ව්‍යායාම අතිශය තීරණාත්මක කාර්යභාරයක් ඉටුකරන බව ජනාධිපතිවරයා මෙහිදී පෙන්වා දුන්නේය. ක්‍රියාශීලී හා සෞඛ්‍ය සම්පන්න ජීවන රටාවකට ජනතාව යොමුකිරීම සඳහා ආකල්පමය වෙනසක් ඇතිකිරීමේ අවශ්‍යතාව අවධාරණය කළ ඒ මහතා, දිවයින පුරා ඇවිදින මංතීරු ඉදිකර තිබුණද ඇතැම් ප්‍රදේශවල ඒවා නිසි පරිදි ප්‍රයෝජනයට නොගන්නා බවත්, මහජනතාව ඒවා භාවිතයට පෙළඹවීම සඳහා නව මුලපිරීම් හඳුන්වා දිය යුතු බවත් සඳහන් කළේය.
මෙම වැඩසටහන් විධිමත්ව සැලසුම් කිරීම සඳහා දිවයින පුරා පිහිටි ක්‍රීඩාංගණ, ඇවිදින මංතීරු සහ ගෘහස්ථ ක්‍රීඩාංගණ පිළිබඳ නිවැරදි හා යාවත්කාලීන දත්ත පද්ධතියක් (Database) පවත්වාගෙන යාමේ වැදගත්කමද ජනාධිපතිවරයා අවධාරණය කළේය.
2027 ක්‍රීඩා යටිතල පහසුකම් සංවර්ධනය
2027 වසර සඳහා යෝජිත ප්‍රධාන යටිතල පහසුකම් සහ සංවර්ධන ව්‍යාපෘති කිහිපයක් පිළිබඳවද මෙම සාකච්ඡාවේදී දීර්ඝ වශයෙන් අවධානය යොමු විය:
ජාතික උසස් කාර්යසාධන මධ්‍යස්ථානයක් (National High-Performance Centre): ශ්‍රී ලාංකික ක්‍රීඩක ක්‍රීඩිකාවන්ගේ දක්ෂතා ජාත්‍යන්තර ප්‍රමිතීන්ට ඔසවා තැබීම උදෙසා ස්ථාපිත කිරීම.
අනුරාධපුරයට නව කෘත්‍රිම ධාවන පථයක්: මීටර් 400ක කෘත්‍රිම ධාවන පථයක් (Synthetic running track) අනුරාධපුරයේ ඉදිකිරීම.
දියගම සහ සුගතදාස ක්‍රීඩාංගණ සංවර්ධනය: දියගම ජාත්‍යන්තර ක්‍රීඩාංගණයේ පවතින අඩුපාඩු කඩිනමින් නිරාකරණය කර සංවර්ධනය කිරීම සහ සුගතදාස ගෘහස්ථ ක්‍රීඩාංගණය නවීකරණය කිරීම.
ඒකාබද්ධ ක්‍රීඩා පර්යේෂණ: ක්‍රීඩා වෛද්‍ය ආයතන සහ විශ්වවිද්‍යාල ඒකාබද්ධ කරගනිමින් ක්‍රීඩාව හා ශාරීරික ව්‍යායාම පිළිබඳ ඒකාබද්ධ පර්යේෂණ ආරම්භ කිරීම.
මීට අමතරව, ජාතික තරුණ සේවා සභාව (NYSC) සහ ජාතික යොවුන් සේනාංකය (NYC) මඟින් ක්‍රියාත්මක කරනු ලබන වැඩසටහන්වල වත්මන් ප්‍රගතිය සහ ඉදිරි සැලසුම් පිළිබඳවද මෙහිදී පුළුල් ලෙස සමාලෝචනය කෙරිණි.
