තොරතුරු තාක්ෂණ (IT/BPO) ක්ෂේත්‍රයේ ආදායම 15.5%කින් පහළට: මුල් මාස නවයේදී ඩොලර් මිලියන 100කට ආසන්න පාඩුවක්
පසුගිය වසරේ අනුරූප කාලසීමාවට සාපේක්ෂව, 2026 වසරේ මුල් මාස නවය (ජනවාරි – සැප්තැම්බර්) තුළ ශ්‍රී ලංකාවේ පරිගණක සහ තොරතුරු තාක්ෂණ/BPO (IT/BPO) සේවා අපනයන ආදායම සියයට 15.5කින් කැපී පෙනෙන ලෙස පහත වැටී ඇති බව ශ්‍රී ලංකා මහ බැංකුව (CBSL) පවසයි.
මහ බැංකුව නිකුත් කළ නවතම ‘බාහිර අංශයේ ක්‍රියාකාරීත්වය’ පිළිබඳ වාර්තාවට අනුව, 2025 වසරේ මුල් මාස නවයේදී ඩොලර් මිලියන 621ක් ලෙස වාර්තා වූ පරිගණක හා තොරතුරු තාක්ෂණ සේවා ආදායම, 2026 වසරේ එම කාලසීමාව තුළදී අමෙරිකානු ඩොලර් මිලියන 524.9ක් දක්වා පහත වැටී තිබේ.
විශේෂයෙන්ම සැප්තැම්බර් මාසය තුළදී පමණක් මෙම අංශයේ ආදායම සියයට 7.2කින් අඩු වී ඇති අතර, 2025 සැප්තැම්බරයේ උපයාගත් ඩොලර් මිලියන 70ක ආදායම මෙවර සටහන් වූයේ ඩොලර් මිලියන 65ක් වශයෙනි.
සමස්ත සේවා අංශයේ ප්‍රවණතාව
සැප්තැම්බර් මාසය තුළ මෙරට සමස්ත සේවා අපනයන ආදායමේ කැපී පෙනෙන වර්ධනයක් දක්නට ලැබුණද, තොරතුරු තාක්ෂණ අංශය මෙලෙස පසුබෑමකට ලක්වීම විශේෂත්වයකි. මහ බැංකු දත්තවලට අනුව, සැප්තැම්බර් මාසයේ සමස්ත සේවා අංශයේ විදේශ විනිමය ගලාඒම් (Services inflows) සියයට 11.2කින් ඉහළ ගොස් ඇති අතර, එය ඩොලර් මිලියන 503.1 සිට ඩොලර් මිලියන 559.5ක් දක්වා වැඩිවීමකි.
කෙසේවෙතත්, ජනවාරි සිට සැප්තැම්බර් දක්වා වූ සමස්ත සේවා ගලාඒම් සියයට 0.6ක සුළු පහත වැටීමක් සටහන් කරමින් අමෙරිකානු ඩොලර් බිලියන 5.26ක් ලෙස සටහන් විය.
නාවික හා ගුවන් සේවා ආදායම ඉහළට
මේ අතර, සාගරික සහ ගුවන් ප්‍රවාහන සේවා ආශ්‍රිත ආදායම පසුගිය සැප්තැම්බර් මාසයේදී සියයට 46.3ක දැවැන්ත වර්ධනයක් අත්කර ගනිමින් අමෙරිකානු ඩොලර් මිලියන 199ක් දක්වා ඉහළ ගොස් ඇත.
එසේ වුවද, සමස්තයක් ලෙස සලකා බැලීමේදී, විදේශ සංචාර සහ ප්‍රවාහන ගෙවීම් ඉහළ යාම හේතුවෙන් 2026 වසරේ පළමු මාස නවය තුළ ශ්‍රී ලංකාවේ සමස්ත සේවා ගිණුමේ අතිරික්තය (Services account surplus) සියයට 22.3කින් පහත වැටී අමෙරිකානු ඩොලර් බිලියන 2.21ක් බවට පත්ව ඇති බවද ශ්‍රී ලංකා මහ බැංකුව වැඩිදුරටත් සඳහන් කරයි.
