යාපනය ඩෙල්ෆ්ට් දූපත් ප්රදේශයේ සෙනසුරාදා වාර්තා වූ පංච පුද්ගල ඝාතන සිද්ධියට සම්බන්ධ සැකකරු සම්බන්ධයෙන් ශ්රී ලංකා පොලිසිය වැඩිදුර තොරතුරු අනාවරණය කරගෙන තිබේ.
පොලිස් මාධ්ය ප්රකාශක ජ්යෙෂ්ඨ පොලිස් අධිකාරී නිහාල් තල්දූව මහතා පැවසුවේ, 51 හැවිරිදි සැකකරු ජර්මනියේ වසර 20කට වැඩි කාලයක් පදිංචිව සිට මෑතකදී ශ්රී ලංකාවට පැමිණ ඇති බවට වාර්තා වන බව මූලික පරීක්ෂණවලින් අනාවරණය වී ඇති බව ය.
සැකකරු ද්විත්ව පුරවැසි භාවය ලබා ඇති අයෙකු බවත්, ඔහු ජර්මනියෙන් පිටුවහල් කිරීමට බොහෝ දුරට ඉඩ ඇති බවත් අනාවරණය වී ඇති බව ජ්යෙෂ්ඨ පොලිස් අධිකාරී තල්දූව වැඩිදුරටත් පැවසීය.
සැකකරු ආපසු පැමිණෙන විට කයිට්ස් සහ පුංගුඩුතිව් දූපත් වල තාවකාලිකව පදිංචිව සිට ඇති බව පොලිසිය සොයා ගෙන ඇත.
ඝාතනය සිදුවූ දිනයේ සැකකරු මියගිය අයගේ නිවසේ සිට ඇති බවට ද විමර්ශනවලදී අනාවරණය වී ඇති බව පොලිස් මාධ්ය ප්රකාශකවරයා වැඩිදුරටත් පැවසීය.
යාපනයේ ඩෙල්ෆ්ට් දූපතේ නිවසක් තුළදී සෙනසුරාදා (22) දින පිරිමින් දෙදෙනෙකු සහ කාන්තාවන් තිදෙනෙකු ඇතුළු පුද්ගලයින් 5 දෙනෙකු කපා කොටා ඝාතනය කර තිබියදී සොයා ගන්නා ලදී.
ඝාතනයට ලක්වූවන් නිවසේ විවිධ ස්ථානවල තියුණු ආයුධවලින් පහරදී ඇති බව වාර්තා වන අතර ප්රධාන සැකකරු ඉරිදා (23) රාත්රියේ අත්අඩංගුවට ගෙන ඇත.
සැකකරු සන්තකයේ තිබී රන් මාල 03ක්, රන් වළලු ජෝඩු 02ක්, මුදු 08ක්, කරාබු ජෝඩු 01ක්, රන් පෙන්ඩන්ට් 01ක් සහ ජංගම දුරකථන 02ක් සොයා ගෙන ඇත.
මෙම ඝාතන සම්බන්ධයෙන් වැඩිදුර පරීක්ෂණ ක්රියාත්මකයි.