කොවිඩ් තෙවැනි රැල්ලේ මරණ ගණන ඉහළ ට

කොවිඩ් තුන්වන රැල්ලේ සමස්ත මරණ ගණන දින 25ක් තුළ 200 සීමාවට ළඟා වී තිබෙන බව දත්ත දෙස බැලීමේදී පෙනීයයි.

දෛනික වැඩිම කොවිඩ් මරණ සංඛ්‍යාව ඊයේ වාර්තා වූ අතර මාස 03ක බිළිඳියක්ද ඒ අතරට අයත් විය.

පළමු කොවිඩ් රැල්ලේ මුල් දින 25 තුළ ආසාදිතයින් 166 දෙනෙකු වාර්තා වෙද්දී සිදුව තිබූ මරණ ගණන 05කි.

දෙවන කොවිඩ් රැල්ලේ මුල් දින 25 තුළ ආසාදිතයින් 5803 දෙනෙකු වාර්තා වෙද්දීත් එම කාලය තුළ මරණ සිදුව තිබුණේ 06ක් පමණි.

නමුත් තුන්වන කොවිඩ් රැල්ලේ මේ වනවිට ගතවී ඇති දින 25ක කාලය තුළ ආසාදිතයින් 32,344 දෙනෙකු වාර්තා වෙද්දී කොවිඩ් මරණ 194 ක් වාර්තා වී තිබේ.

ඒ අනුව ආසාදිතයින්ට සාපේක්ෂව මරණ සංඛ්‍යාවද සීඝ්‍රයෙන් ඉහළයාම ඉදිරි සති කිහිපය සම්බන්ධයෙන් භයානක තත්ත්වයක් බව සෞඛ්‍ය අංශ පවසති.

ඒ අතරවාරයේ දිනක් තුළ වාර්තා වූ වැඩිම මරණ සංඛ්‍යාවත් ඊයේ වාර්තා විය.

එම ගණන 26කි.

කොළඹින් 08ක්, කළුතරින් 06ක් ,ගම්පහ, ගාල්ල, මහනුවර හා යාපනය දිස්ත්‍රික්කවලින් 02 බැගින් මෙන්ම අනුරාධපුරය, කුරුණෑගල, නුවරඑළිය හා මාතර දිස්ත්‍රික්කවලින් එක් මරණය බැගින්ද ඊයේ වාර්තා වුණි.

ඒ අතරට වත්තේගම ප්‍රදේශයේ මාස 03ක් වයසැති බිළිඳියකද විය.