කැනඩාවේ රැකියා ලබාදෙන බව පවසමින් ශ්රී ලාංකිකයන් තිදෙනෙකු ඉතියෝපියාවට යවා පැහැරගැනීමේ සිද්ධිය සම්බන්ධයෙන් සැකකරුවෙකු අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන තිබේ.
රැකියා ලබාදෙන බවට පොරොන්දු වී ඩුබායි හරහා ඉතියෝපියාවට ගෙන්වාගත් ශ්රී ලාංකිකයන් තිදෙනෙකු සංවිධානාත්මක විදේශීය අපරාධ කණ්ඩායමක් විසින් පැහැරගෙන ඇති බවට මැයි 27 වැනිදා පැමිණිල්ලක් ලැබී තිබිණි. කිලිනොච්චියේ පදිංචි පුද්ගලයෙකුගේ උපදෙස් මත ඔවුන් ඉතියෝපියාවට ගොස් ඇති බවද විමර්ශනවලදී අනාවරණය වී තිබේ.
CID හි මිනිස් ජාවාරම්, ජාවාරම් විමර්ශන සහ සමුද්රීය අපරාධ විමර්ශන අංශය සිදුකළ විමර්ශනවලදී අනාවරණය වී ඇත්තේ විදේශ රැකියා අවස්ථා ලබාදීම සඳහා මෙම සැකකරුට වින්දිතයන් විසින් රුපියල් ලක්ෂ 64කට ආසන්න මුදලක් ලබාදී ඇති බවයි.
වැඩිදුර විමර්ශනවලදී, වින්දිතයන් මුදාගැනීම සඳහා අවශ්ය බව පවසමින් ඔවුන්ගේ ඥාතීන්ගෙන් රුපියල් මිලියන 20කට ආසන්න මුදලක්ද සැකකරු විසින් ලබාගෙන ඇති බවට තොරතුරු අනාවරණය වී තිබේ.
පැහැරගැනීමට සම්බන්ධ විදේශීය අපරාධ කණ්ඩායම සමඟ මෙම සැකකරු සම්බන්ධතා පවත්වා ඇති බවටද විමර්ශකයන් තොරතුරු අනාවරණය කරගෙන තිබේ.
ඒ අනුව, නෙදුන්කේණි ප්රදේශයේ සැඟව සිටියදී සැකකරු අත්අඩංගුවට ගෙන ඇත.
වින්දිතයන් මුදාගැනීම සඳහා CID විසින් අඩිස් අබාබාහි පොලිසිය සහ අදාළ රාජ්යතාන්ත්රික බලධාරීන් සමඟ සම්බන්ධීකරණයෙන් කටයුතු කර තිබේ. ඒ අනුව ජුනි 6 වැනිදා ඉතියෝපියානු බලධාරීන් විසින් ශ්රී ලාංකිකයන් තිදෙනා මුදාගෙන ඇති අතර, සිද්ධිය සම්බන්ධයෙන් පකිස්ථාන ජාතිකයන් සිව්දෙනෙකු සහ ඉතියෝපියානු ජාතිකයෙකු අත්අඩංගුවට ගෙන තිබේ.
වයස අවුරුදු 26ත් 34ත් අතර පසුවන වින්දිතයන් තිදෙනා යාපනය, වවුනියාව සහ කිලිනොච්චිය යන ප්රදේශවල පදිංචිකරුවන් වන අතර, ඔවුන් අගෝස්තු 1 වැනිදා ශ්රී ලංකාවට යළි රැගෙනවිත් තිබේ.
මෙම සිද්ධියට සම්බන්ධ විදේශීය සංවිධානාත්මක අපරාධ ජාලය සමඟ සැකකරු පවත්වාගෙන ඇති සම්බන්ධතාවල සම්පූර්ණ තොරතුරු අනාවරණය කරගැනීම සඳහා වැඩිදුර විමර්ශන ක්රියාත්මක බව CID සඳහන් කළේය.
