“KDU රෝහල රජයේ එකක්ද? පුද්ගලික එකක්ද? ” – ඇඳන් 800ක රෝහල භාවිත නොකිරීම සහ රුපියල් ලක්ෂ 84ක තඹ පටි සොරකම ගැන කෝප් කමිටුවෙන් උපදෙස්

ජනරාල් ශ්‍රීමත් ජෝන් කොතලාවල ආරක්ෂක විශ්වවිද්‍යාල (KDU) රෝහල රජයේ රෝහල් ආකෘතියක් (Government Hospital Model) යටතේ පවත්වාගෙන යන්නේද නැතහොත් පෞද්ගලික රෝහල් ආකෘතියක් (Private Hospital Model) යටතේ ක්‍රියාත්මක කරන්නේද යන්න පිළිබඳව කඩිනමින් අවසන් තීරණයක් ගන්නා ලෙස පොදු ව්‍යාපාර පිළිබඳ කාරක සභාව (COPE) බලධාරීන්ට දැඩි උපදෙස් ලබා දී තිබේ.

පාර්ලිමේන්තු මන්ත්‍රී ආචාර්ය නිශාන්ත සමරවීර මහතාගේ සභාපතිත්වයෙන් යුත් කෝප් කමිටුව හමුවට කොතලාවල ආරක්ෂක විශ්වවිද්‍යාලයේ පාලනාධිකාරිය කැඳවා, 2023 සහ 2024 වර්ෂ සඳහා වූ විගණකාධිපති වාර්තා මෙන්ම ආයතනයේ වත්මන් කාර්යසාධනය පරීක්ෂා කළ අවස්ථාවේදී මෙම නියෝගය නිකුත් කෙරිණි.

පාර්ලිමේන්තු සන්නිවේදන දෙපාර්තමේන්තුව නිකුත් කළ නිවේදනයකට අනුව, ඇඳන් 800කට අධික ධාරිතාවකින් යුත් මෙම දැවැන්ත රෝහලේ වාට්ටු, ශල්‍යාගාර සහ දැඩි සත්කාර ඒකක (ICU) ඇතුළු පහසුකම් පූර්ණ ධාරිතාවෙන් ප්‍රයෝජනයට නොගැනීම (Underutilisation) පිළිබඳව කාරක සභාවේ දැඩි කනස්සල්ල පළවිය. මීට අමතරව වෛද්‍ය නිලධාරීන්ගේ සහ අනෙකුත් සෞඛ්‍ය කාර්ය මණ්ඩලයේ පවතින දැඩි හිඟය පිළිබඳවද මෙහිදී අවධානය යොමු විය.

රෝහල පවත්වාගෙන යන නිශ්චිත මෙහෙයුම් ආකෘතිය සම්බන්ධයෙන් කඩිනම් තීරණයකට එළඹ අවශ්‍ය ක්‍රියාමාර්ග නොගතහොත්, දැනට පවතින ගැටලු තවදුරටත් උග්‍ර විය හැකි බවට කෝප් කමිටුව අනතුරු ඇඟවීය. එමෙන්ම රෝහල ඉදිකිරීම සඳහා ලබාගත් විදේශ ණය ආපසු ගෙවීමේ ගැටලු සහ මූල්‍ය හා පරිපාලන කළමනාකරණයේ පවතින දුර්වලතා රැසක්ද මෙහිදී අනාවරණය විය.

රුපියල් ලක්ෂ 84ක අකුණු සන්නායක තඹ පටි සොරකම

මේ අතර, රෝහලේ අකුණු ආරක්ෂණ පද්ධතියට (Lightning protection system) අයත් මීටර් 2,199ක තඹ පටි තොගයක් සොරකම් කිරීම හේතුවෙන් රෝහලට රුපියල් මිලියන 8.44ක (රුපියල් ලක්ෂ 84කට වැඩි) පාඩුවක් සිදුව ඇති බව කෝප් කමිටුවේදී හෙළිදරව් විය.

2022 සහ 2023 වසරවලදී වාර්තා වූ මෙම සොරකම් සම්බන්ධයෙන් සිවිල් කොන්ත්‍රාත් සේවකයෙකු සහ නාවික හමුදා සාමාජිකයෙකු අත්අඩංගුවට ගෙන තිබිණි. කෙසේවෙතත්, සොරකම් කරන ලද තඹ පටි වෙනුවට ඇලුමිනියම් වයර් යෙදීම අදාළ තාක්ෂණික සහ ආරක්ෂිත ප්‍රමිතීන්ට අනුකූලව සිදුවූයේද යන්න පිළිබඳවද කාරක සභාව බලධාරීන්ගෙන් ප්‍රශ්න කළේය.

රෝහලේ භෞතික පහසුකම් උපරිමයෙන් ජනතා සේවයට යෙදවීම, කාර්ය මණ්ඩල හිඟයට විසඳුම් සෙවීම, මූල්‍ය විනය ශක්තිමත් කිරීම සහ මහජන සම්පත් වඩාත් ඵලදායී ලෙස භාවිත කිරීම සහතික කිරීමේ හදිසි අවශ්‍යතාව අවධාරණය කළ කෝප් කමිටුව, විශ්වවිද්‍යාලයේ පාලන හා පරිපාලන ව්‍යුහය ශක්තිමත් කිරීම සඳහා පවතින KDU පනතට කඩිනමින් සංශෝධන එක්කිරීමේ අවශ්‍යතාවද පෙන්වා දුන්නේය.