ශ්‍රේණිගත කිරීම්වල ශ්‍රී ලංකාවේ අංක 1 විශ්වවිද්‍යාලය ලෙස කොළඹ විශ්වවිද්‍යාලය යළිත් ඉදිරියට
වෙබොමෙට්‍රික්ස් (Webometrics) විශ්වවිද්‍යාල ශ්‍රේණිගත කිරීම් අනුව ශ්‍රී ලංකාවේ අංක 1 විශ්වවිද්‍යාලය ලෙස කොළඹ විශ්වවිද්‍යාලය යළිත් වරක් ශ්‍රේණිගත වී තිබේ.
ලොව පුරා රටවල් 200කට අධික සංඛ්‍යාවක උසස් අධ්‍යාපන ආයතන 32,000කට වැඩි සංඛ්‍යාවක් අතරින් කොළඹ විශ්වවිද්‍යාලය ගෝලීය වශයෙන් 1,745 වැනි ස්ථානය හිමිකරගෙන ඇත.
වෙබොමෙට්‍රික්ස් ශ්‍රේණිගත කිරීම ප්‍රධාන දර්ශක තුනක් මත පදනම් වේ. එනම්, විශ්වවිද්‍යාලයේ වෙබ් අඩවියට බාහිර සබැඳි ජාල මගින් ලැබෙන සම්බන්ධතා මනින Visibility (50%), 2021 සිට 2025 දක්වා කාලය තුළ විෂය ක්ෂේත්‍ර 27ක වැඩිම උපුටා දැක්වීම් ලැබූ පර්යේෂණ පත්‍රිකා අතර ඉහළම 10% තුළ පළ වූ ප්‍රකාශන මත පදනම් වූ Excellence (40%), සහ Research Organization Registry (ROR) හඳුනාගැනීමක් සහිත ආයතන වෙත ලැබුණු උපුටා දැක්වීම් සලකා බලන Openness (10%) යන දර්ශක වේ.
කොළඹ විශ්වවිද්‍යාලය සඳහන් කළේ මෙම ජයග්‍රහණය අධ්‍යයන විශිෂ්ටත්වය ඉහළ නැංවීම සහ පර්යේෂණ බලපෑම ශක්තිමත් කිරීම සඳහා විශ්වවිද්‍යාලය දරන අඛණ්ඩ කැපවීම පිළිබිඹු කරන බවයි.
2026 ජූලි මාසයේ වෙබොමෙට්‍රික්ස් ශ්‍රේණිගත කිරීම් අනුව ශ්‍රී ලංකාවේ ඉහළම විශ්වවිද්‍යාල සහ උසස් අධ්‍යාපන ආයතන 10 පහත පරිදි වේ.
- කොළඹ විශ්වවිද්‍යාලය – ලෝක ශ්‍රේණිගත කිරීම: 1,745
- ශ්‍රී ජයවර්ධනපුර විශ්වවිද්‍යාලය – 2,125
- පේරාදෙණිය විශ්වවිද්‍යාලය – 2,258
- රුහුණ විශ්වවිද්‍යාලය – 2,504
- මොරටුව විශ්වවිද්‍යාලය – 3,004
- කැලණිය විශ්වවිද්‍යාලය – 3,104
- යාපනය විශ්වවිද්‍යාලය – 3,584
- රජරට විශ්වවිද්‍යාලය – 4,076
- ශ්‍රී ලංකා තොරතුරු තාක්ෂණ ආයතනය (SLIIT) – 4,178
- සබරගමුව විශ්වවිද්‍යාලය – 4,254
