පොල්ගොල්ල රෝහලට පුටු ගෙන රජයට රුපියල් ලක්ෂ 80ක පාඩුවක් කළ හිටපු අමාත්‍යාංශ ලේකම් අල්ලස් කොමිසමේ දැලේ
පොල්ගොල්ල මහින්ද රාජපක්ෂ රෝහල සඳහා පුටු මිලදී ගැනීමේදී රජයට රුපියල් ලක්ෂ 80කට ආසන්න මූල්‍ය පාඩුවක් සිදුකළ බවට එල්ල වූ දූෂණ චෝදනාවක් සම්බන්ධයෙන් සමූපකාර හා අභ්‍යන්තර වෙළෙඳ අමාත්‍යාංශයේ හිටපු ලේකම් ගාමිණී කිත්සිරි ඩයස් අමරවර්ධන මහතා අල්ලස් හෝ දූෂණ චෝදනා විමර්ශන කොමිෂන් සභාව (CIABOC) මඟින් අත්අඩංගුවට ගෙන තිබේ.
අල්ලස් කොමිසම සඳහන් කරන්නේ, එහි විමර්ශන නිලධාරීන් විසින් ඊයේ (02) පෙරවරු 9.45ට පමණ මෙම හිටපු අමාත්‍යාංශ ලේකම්වරයාව අත්අඩංගුවට ගත් බවයි.
පොල්ගොල්ල රෝහලට අවශ්‍ය පුටු මිලදී ගැනීමේ ටෙන්ඩර් ක්‍රියාවලියේදී, නියමිත ප්‍රමිතීන්ට අනුකූලව අඩුම ලංසුව ඉදිරිපත් කර තිබූ සමාගම නොසලකා හරිමින්, බාහිර පාර්ශ්වයකට අයුතු සහගත වාසියක් සැලසෙන පරිදි වෙනත් පෞද්ගලික සමාගමකින් අදාළ පුටු තොගය මිලදී ගැනීමට කටයුතු සලසා දීම සම්බන්ධයෙන් ඔහුට චෝදනා එල්ල වී ඇත.
රජයට සිදුවූ ලක්ෂ 80ක පාඩුව
මෙම නීතිවිරෝධී ප්‍රසම්පාදන අක්‍රමිකතාව හේතුවෙන් රජයට රුපියල් 7,973,114.50ක (රුපියල් හැත්තෑනව ලක්ෂ හැත්තෑතුන් දහස් එකසිය දහහතරයි ශත පනහක) දැවැන්ත මූල්‍ය පාඩුවක් සිදුව ඇති බව අල්ලස් හෝ දූෂණ චෝදනා විමර්ශන කොමිෂන් සභාව පෙන්වා දෙයි.
ඒ අනුව, රාජ්‍ය නිලධාරියෙකු ලෙස රාජකාරිය ඉටුකිරීමේදී ‘දූෂණය’ (Corruption) නමැති වරද සිදුකළ බවට ඔහුට එරෙහිව චෝදනා ගොනුකර තිබේ.
අත්අඩංගුවට ගත් හිටපු අමාත්‍යාංශ ලේකම් ගාමිණී කිත්සිරි ඩයස් අමරවර්ධන මහතා කොළඹ ප්‍රධාන මහේස්ත්‍රාත් අධිකරණය හමුවට ඉදිරිපත් කිරීමට නියමිතව තිබේ.
