පාස්කු ඉරිදා ප්‍රහාරය ගැන විශ්වසනීය පරීක්ෂණයක් නාමල් ඉල්ලයි
දේශපාලන එදිරිවාදිකම්වලට හෝ භූ දේශපාලන න්‍යාය පත්‍රවලට හසු නොවී 2019 පාස්කු ඉරිදා ප්‍රහාරය පිළිබඳ විමර්ශනය සාධාරණ හා විනිවිදභාවයකින් යුතුව සිදු කළ යුතු බව පාර්ලිමේන්තු මන්ත්‍රී නාමල් රාජපක්ෂ මහතා පවසයි.
පාස්කු ඉරිදා ත්‍රස්ත ප්‍රහාරයෙන් විපතට පත් වූවන්ට සහ විපතට පත් වූ පවුල්වලට සාධාරණය ඉටු කරන බවට පොරොන්දු වෙමින් වත්මන් රජය බලයට පත් වූ බව මන්ත්‍රීවරයා සිය X ගිණුමේ සටහනක් තබමින් කියා සිටියේය.
කෙසේ වෙතත්, විමර්ශනවල වර්තමාන ප්‍රගතිය අවසානයේ එම පොරොන්දුව ඉටු කරන්නේද යන්න සහ විමර්ශනයේ විශ්වසනීයත්වය ආරක්ෂා වන්නේද යන්න පිළිබඳව බරපතල කනස්සල්ලක් ඇති කරන බව ඔහු පැවසීය.
සාධාරණ, පාරදෘශ්‍ය හා අපක්ෂපාතී පරීක්ෂණයකට තමා සහාය දෙන බව පැවසූ රාජපක්ෂ, ප්‍රහාරවලට වගකිවයුත්තන් හඳුනාගෙන නීතියට අනුව දඬුවම් කළ යුතු බව පැවසීය.
“මෙම කුරිරු ත්‍රස්තවාදී ක්‍රියාව පිටුපස සිටින සැබෑ කුමන්ත්‍රණකරුවන් හඳුනාගෙන නීතියට අනුව දඬුවම් කළ යුතු බව අපි තරයේ විශ්වාස කරමු,” ඔහු පැවසීය.
මේ අතර සුරේෂ් සාලේ අත්අඩංගුවට ගැනීම සම්බන්ධයෙන් අදහස් දක්වමින් රාජපක්ෂ මහතා ඔහුව හඳුන්වා දුන්නේ ශ්‍රී ලංකාවේ රාජ්‍ය බුද්ධි සේවයේ සේවය කළ ගෞරවනීය හමුදා නිලධාරියෙකු ලෙසය.
දශක තුනකට ආසන්න කාලයක් පැවති ගැටුමේදී ත්‍රස්තවාදය පරාජය කිරීමට ශ්‍රී ලංකාව ගත් උත්සාහයන්හිදී රාජ්‍ය බුද්ධි සේවයේ හිටපු අධ්‍යක්ෂවරයා වැදගත් කාර්යභාරයක් ඉටු කළ බව ඔහු පැවසීය.
ජාතික ආරක්ෂාව සඳහා සාලේගේ දායකත්වය ප්‍රශංසනීය බව පැවසූ රාජපක්ෂ, කාලයාගේ ඇවෑමෙන් පාස්කු ප්‍රහාරයට ඔහු සම්බන්ධ කරමින් දේශපාලන බලපෑම් සහිත ආඛ්‍යාන නිර්මාණය වූ බව කියා සිටියේය.
ප්‍රහාර සම්බන්ධයෙන් වගකීම පැහැර හැර ඇති බවට චෝදනා එල්ල වී ඇති ඇතැම් පුද්ගලයින් සම්බන්ධයෙන් එම මට්ටමේ විමර්ශන සිදු කර නොමැති බවට ද මන්ත්‍රීවරයා චෝදනා කළා.
නොසැලකිලිමත්කම සම්බන්ධයෙන් නිල කොමිෂන් සභා වාර්තාවල සඳහන් ඇතැම් පුද්ගලයන් පසුව වත්මන් රජයට සම්බන්ධ වී ඉහළ තනතුරුවලට පත් වූ බවත්, සුරේෂ් සාලේ විශේෂයෙන් විමර්ශන සඳහා ඉලක්ක කර ඇති බවත් ඔහු වැඩිදුරටත් පැවසීය.
