දෙහිවල ප්රදේශයේ සිදුකළ ඝාතන තැතක් සහ ගල්කිස්ස ප්රදේශයේ සිදුකළ ගිනි අවියක් පෙන්වා තර්ජනය කිරීමේ සිද්ධියකට සම්බන්ධ බවට සැක කෙරෙන අත්තිඩිය ප්රදේශයේ 25 හැවිරිදි පුද්ගලයෙකු බස්නාහිර පළාත් දකුණු දිසා අපරාධ විමර්ශන ඒකකය විසින් සිදුකළ වැටලීමකදී අත්අඩංගුවට ගෙන තිබේ.
පොලිසිය සඳහන් කළේ, ජූලි 19 වන දින දෙහිවල ප්රදේශයේ සුසාන භූමියක් ආසන්නයේදී යතුරුපැදියකින් පැමිණි නාඳුනන පුද්ගලයන් දෙදෙනෙකු පුද්ගලයෙකු ඝාතනය කිරීමට උත්සාහ කරමින් වෙඩි තැබීමක් සිදුකර ඇති බවයි.
මීට අමතරව, ගල්කිස්ස ප්රදේශයේදී තවත් පුද්ගලයෙකුට ගිනි අවියක් එල්ල කර තර්ජනය කිරීමේ සිද්ධියක්ද වාර්තා වී තිබේ.
විමර්ශනවලදී මෙම සිද්ධීන් දෙකටම සම්බන්ධ යතුරුපැදිකරු විදේශගතව සිටින සංවිධානාත්මක අපරාධකරුවෙකු සමඟ සම්බන්ධතා පවත්වන බවට අනාවරණය වී ඇතැයි පොලිසිය සඳහන් කළේය.
ලැබුණු බුද්ධි තොරතුරු මත ක්රියාත්මක වූ නිලධාරීන් ඊයේ (26) උදෑසන මිරිහාන පොලිස් වසමේ දෙල්කඳ ප්රදේශයේදී සැකකරු අත්අඩංගුවට ගෙන ඇත.
අත්අඩංගුවට ගන්නා අවස්ථාවේදී සැකකරු සන්තකයේ තිබී අයිස් මත්ද්රව්ය ග්රෑම් 7.200ක් සොයාගෙන තිබේ.
ප්රශ්න කිරීමේදී අපරාධ සඳහා භාවිත කළ ජංගම දුරකථන තුනක් සහ එම මෙහෙයුම් සඳහා ඔහුට ගෙවා ඇති බව කියන රුපියල් 200,000ක මුදලින් රුපියල් 55,000ක්ද පොලිසිය විසින් සොයාගෙන ඇත.
බස්නාහිර පළාත් දකුණු දිසා අපරාධ විමර්ශන ඒකකය වැඩිදුර විමර්ශන සිදුකරමින් පවතී.
