ස්විට්සර්ලන්ත තානාපති කාර්යාලයේ නිලධාරිනියක් පැහැරගත් බව කියන සිද්ධියට අදාලව එම තානාපති කාර්යාලය සතු තොරතුරු අපරාධ පරික්ෂණ දෙපාර්තමේන්තුවට ලබාදී ඇතැයි වාර්තා වේ.
සිද්ධිය සම්බන්ධයෙන් ලද තොරතුරක් මත අපරාධ පරික්ෂණ දෙපාර්තමේන්තුව විසින් පසුගිය 27 වනදා ඊට අදාල විමර්ශන ආරම්භ කර ඇත.
සිද්ධියට අදාල විමර්ශන කටයුතු වලට සහය ලබාදීම සදහා කොළඹ අපරාධ කොට්ඨාසයේ නිලධාරින් කණ්ඩායමක් සහ පොලිස් සමීප රූප ආවේෂණ කැමරා කොට්ඨාසයේ නිලධාරින් කණ්ඩායමක් ද අපරාධ පරික්ෂණ දෙපාර්තමේන්තුවේ විමර්ශනවල සහය සඳහා යොදවා ඇති බව පොලිස් මාධ්‍ය ප්‍රකාශක කාර්යාලය පවසයි.
පැහැර ගැනිම සිදු කළ පුද්ගලයින් අපරාධ පරික්ෂණ දෙපාර්තමේන්තුවේ නිලධාරින් බවට පැවසීම සාවද්‍යවන අතර එය පරික්ෂණ නොමඟ යැවිම සඳහා සැකකරුවන් ප්‍රකාශ කර ඇති බව ද පොලිස් මාධ්‍ය ප්‍රකාශක කියයි.
සිද්ධියට අදාල සැකකරුවන් කඩිනමින් අත්අඩංගුවට ගන්නා ලෙස අපරාධ පරික්ෂණ දෙපාර්තමේන්තුවට උපදෙස් ලබාදී ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි රුවන් ගුණසේකර මහතා වැඩිදුරටත් සදහන් කර ඇත.
මේ සම්බන්ධයෙන් පරීක්ෂණ කඩිනම් කරන ලෙස අගමැති මහින්ද රාජපක්ෂ මහතාද දැනුම්දී තිබිණි.
