යෝජිත 22 වැනි ආණ්ඩුක්රම ව්යවස්ථා සංශෝධනයට එරෙහිව සැප්තැම්බර් 24 සහ 25 යන දෙදින තුළ වඩාත් ශක්තිමත් හා සම්බන්ධීකරණයෙන් යුතු මහජන විරෝධතා ව්යාපාරයක් සංවිධානය කරන ලෙස එක්සත් වෘත්තීය සමිති කැඳවුම්කරු සහ සමගි ජන බලවේගයේ විධායක මණ්ඩල සාමාජික අනන්ද පාලිත මහතා ඉල්ලා තිබේ.
සමගි ජන බලවේගයේ නායකත්වය වෙත යොමු කළ ලිපියක් මගින් ඔහු පෙන්වා දී ඇත්තේ යෝජිත සංශෝධනයට එරෙහි විරෝධතාව තවදුරටත් ශක්තිමත් කර පුළුල් කිරීම සම්බන්ධයෙන් සාකච්ඡා කිරීම සඳහා පක්ෂයේ වැඩකාරක කමිටුව, වෘත්තීය සමිති, සිවිල් සමාජ සංවිධාන සහ පක්ෂ සංවිධාන කැඳවා නොමැති බවයි.
එබැවින් විපක්ෂ නායකවරයා සහ සමගි ජන බලවේගයේ මන්ත්රීවරුන් අනෙකුත් විපක්ෂ දේශපාලන පක්ෂ, පක්ෂ සංවිධාන, නීතිඥවරුන්, වෘත්තීය සමිති සහ සිවිල් සමාජ කණ්ඩායම් සමඟ කඩිනමින් සාකච්ඡා ආරම්භ කර දෙදින තුළ ශක්තිමත් මහජන විරෝධතා ව්යාපාරයක් සංවිධානය කළ යුතු බව ඔහු යෝජනා කර ඇත.
මාධ්ය සාකච්ඡා, විරෝධතා, පෝස්ටර් සහ පත්රිකා බෙදාහැරීමේ වැඩසටහන් ඇතුළු ක්රියාමාර්ග ඒ සඳහා යොදාගත යුතු බවද ඔහු සඳහන් කර තිබේ.
එමෙන්ම සංශෝධන පනත් කෙටුම්පත පාර්ලිමේන්තුවට ඉදිරිපත් කරන අවස්ථාවේදී මෙන්ම එය ඡන්ද විමසීමකට ගන්නා අවස්ථාවේදීද ආණ්ඩුව වෙත අඛණ්ඩව පීඩනයක් එල්ල කළ යුතු බව අනන්ද පාලිත මහතා පවසා ඇත.
සංශෝධනය සම්මත නොකරන ලෙස ඉල්ලා රට පුරා බැනර් ප්රදර්ශනය කිරීම සහ විරෝධතා ව්යාපාරය සම්බන්ධීකරණය කිරීම සඳහා කඩිනම් ඒකාබද්ධ රැස්වීම් පැවැත්වීමද ඔහු යෝජනා කර තිබේ.
විපක්ෂ දේශපාලන පක්ෂ, වෘත්තීය සමිති, සිවිල් සමාජ සංවිධාන සහ ප්රාදේශීය මට්ටමේ සංවිධාන එක්ව මැතිවරණ කොට්ඨාස, ප්රාදේශීය සභා සහ නගර සභා මට්ටමින් මහජන විරෝධය ප්රදර්ශනය කළ යුතු බවද ඔහු සඳහන් කර ඇත.
22 වැනි ව්යවස්ථා සංශෝධනය පිළිබඳ දෙවැනිවර කියවීමේ විවාදය සැප්තැම්බර් 24 සහ 25 යන දිනවල පාර්ලිමේන්තුවේදී පැවැත්වීමට පාර්ලිමේන්තු කටයුතු පිළිබඳ කාරක සභාව තීරණය කර තිබේ.
ආණ්ඩුවට සැලකිය යුතු මහජන විරෝධයකින් තොරව යෝජිත සංශෝධනය සම්මත කර ගැනීමට හැකිවන තත්ත්වයක් ඇතිවීම වැළැක්වීම සඳහා සමගි ජන බලවේගය වහාම පියවර ගත යුතු බවද අනන්ද පාලිත මහතා සිය ලිපිය මගින් වැඩිදුරටත් ඉල්ලා තිබේ.
