විනිසුරු නිලධාරීන් සිය වැටුප් සඳහා ආදායම් බදු ගෙවීමට යටත් වන බවත්, ඔවුන්ගේ වැටුපෙන් අත්තිකාරම් පුද්ගල ආදායම් බදු (APIT) අඩු කිරීම නීත්යනුකූල බවත් ශ්රේෂ්ඨාධිකරණය තීන්දු කර තිබේ.
විනිසුරු නිලධාරීන් නියෝජනය කරන සංගම් තුනක් විසින් ගොනුකර තිබූ අභියාචනා තුනක් ප්රතික්ෂේප කරමින් සැප්තැම්බර් 15 වැනිදා මෙම තීන්දුව ප්රකාශයට පත් කර ඇත.
මහාධිකරණ විනිසුරුවරුන්ගේ සංගමය, අධිකරණ සේවා සංගමය සහ කම්කරු විනිශ්චය සභා අධිකරණ නිලධාරීන්ගේ සංගමය නියෝජනය කරමින් මෙම අභියාචනා ගොනුකර තිබිණි.
2023 වසරේදී අභියාචනාධිකරණය විසින් විනිසුරු නිලධාරීන්ගේ වැටුපෙන් APIT අය කිරීම සහ අඩු කිරීම සම්බන්ධයෙන් ඉදිරිපත් කළ පෙත්සම් ප්රතික්ෂේප කිරීමට එරෙහිව මෙම අභියාචනා ඉදිරිපත් කර තිබේ.
අගවිනිසුරු පී. පද්මන් සූරසේන මහතා සහ ඒ.එල්. ශිරාන් ගුණරත්න, ජනක් ද සිල්වා, මහින්ද සමයවර්ධන සහ අර්ජුන ඔබේසේකර යන ශ්රේෂ්ඨාධිකරණ විනිසුරුවරුන්ගෙන් පස්දෙනෙකුගෙන් සමන්විත විනිසුරු මඬුල්ලක් මෙම නඩු විභාගයට සහභාගි විය.
විනිසුරු නිලධාරීන්ගේ පාර්ශ්වය තර්ක කර තිබුණේ තමන් රජයේ හෝ වෙනත් කිසිදු පුද්ගලයෙකුගේ සේවකයන් නොවන බවත්, බදු අය කිරීමේ අරමුණින් තමන් සේවකයන් ලෙස සැලකීම අධිකරණයේ ස්වාධීනත්වය සම්බන්ධයෙන් ආණ්ඩුක්රම ව්යවස්ථාමය මූලධර්මයට පටහැනි බවත්ය.
ඉදිරියේදී APIT අඩු කිරීම නතර කරන ලෙසත්, මේ වන විට අඩු කර ඇති මුදල් නැවත ලබාදෙන ලෙසත් ඔවුන් ඉල්ලා තිබිණි.
කෙසේ වෙතත්, විනිසුරු ජනක් ද සිල්වා මහතා සිය තීන්දුවෙන් පෙන්වා දී ඇත්තේ ආදායම් බදු පනත මගින් සාම්ප්රදායික අර්ථයෙන් විනිසුරු නිලධාරීන් සහ වගඋත්තරකරුවන් අතර සේවායෝජක-සේවක සම්බන්ධතාවක් නිර්මාණය නොකරන බවයි.
එහිදී වැටුප් ගෙවනු ලබන්නේ කවුරුන් විසින්ද යන්න හඳුනාගෙන APIT අඩු කිරීමේ වගකීම පැවරිය යුතු පාර්ශ්වය තීරණය කිරීම සඳහා පමණක් වැටුප් ගෙවන්නා හඳුනාගැනීම ආදායම් බදු පනත මගින් සිදුකරන බවද ඔහු සඳහන් කර තිබේ.
විනිසුරු නිලධාරීන්ට ආදායම් බදු පනත අදාළ කිරීම ආණ්ඩුක්රම ව්යවස්ථාව උල්ලංඝනය නොකරන බවද ශ්රේෂ්ඨාධිකරණය තීන්දු කළේය.
මෙම බද්ද සාමාන්යයෙන් සියලුදෙනාට අදාළ වන, වෙනස්කම් නොකරන බද්දක් බවත්, එමගින් විනිසුරු නිලධාරීන්ගේ වැටුප් අඩු කිරීමක් සිදු නොවන බැවින් අධිකරණ ස්වාධීනත්වයට බලපෑමක් ඇති නොවන බවත් ශ්රේෂ්ඨාධිකරණය පෙන්වා දී ඇත.
නඩුවේ ප්රධාන නීතිමය කරුණු සම්බන්ධයෙන් තීන්දුව ලබාදෙමින් ශ්රේෂ්ඨාධිකරණය ප්රකාශ කළේ මහාධිකරණ විනිසුරුවරුන්, දිසා විනිසුරුවරුන් සහ මහේස්ත්රාත්වරුන් සිය වැටුප් මත ආදායම් බදු ගෙවීමට යටත් වන බවයි.
එම වැටුපෙන් APIT අඩු කිරීමට අදාළ බලධාරීන්ට නීත්යනුකූල බලයක් ඇති බවද අධිකරණය තීන්දු කළේය.
කෙසේ වෙතත්, ආදායම් බදු හඳුන්වාදීමෙන් පසුව විනිසුරු නිලධාරීන් මුහුණ දෙන මූල්ය දුෂ්කරතා පිළිබඳවද ශ්රේෂ්ඨාධිකරණ තීන්දුවේදී අවධානය යොමු කර තිබේ.
විනිසුරු ජනක් ද සිල්වා මහතා සඳහන් කර ඇත්තේ විසඳුම විය යුත්තේ සාමාන්යයෙන් සියලුදෙනාට අදාළ බද්දකින් විනිසුරුවරුන් නිදහස් කිරීම නොවන බවයි.
ඒ වෙනුවට, ඔවුන් සතු වගකීම් සහ ජාතික වැටුප් ප්රතිපත්තිය තුළ ඔවුන්ට හිමි සුවිශේෂී තත්ත්වය සැලකිල්ලට ගනිමින් විනිසුරු නිලධාරීන්ට ප්රමාණවත් වැටුප් සහ දීමනා ලබාදීම සහතික කළ යුතු බව ඔහු පෙන්වා දී ඇත.
අභියාචනා තුනම ගාස්තු රහිතව ප්රතික්ෂේප කිරීමට ශ්රේෂ්ඨාධිකරණය නියෝග කළේය.
අගවිනිසුරු පී. පද්මන් සූරසේන මහතා සහ විනිසුරුවරුන් වන මහින්ද සමයවර්ධන සහ අර්ජුන ඔබේසේකර යන මහත්වරු විනිසුරු ජනක් ද සිල්වා මහතා විසින් ලබාදුන් තීන්දුව සමඟ එකඟ වූහ.
