විශ්වවිද්යාල පද්ධතිය තුළ උද්ගතව ඇති ගැටලුකාරී තත්ත්වයට විසඳුමක් ලබාදීමට අග්රාමාත්ය සහ අධ්යාපන අමාත්ය හරිනි අමරසූරිය මහත්මිය සමඟ පැවති සාකච්ඡාවෙන් කිසිදු විසඳුමක් ලැබී නොමැති බව විශ්වවිද්යාල ආචාර්යවරුන්ගේ සංගම් සම්මේලනය (FUTA) පවසයි.
බත්තරමුල්ල අධ්යාපන අමාත්යාංශයේදී පැවති මෙම සාකච්ඡාවේදී විශ්වවිද්යාල සඳහා ශිෂ්යයන් ඇතුළත් කර ගැනීම, ආචාර්යවරුන්ගේ හිඟය සහ ශිෂ්යයන් විශ්වවිද්යාල තුළ රැඳී සිටින කාලය දීර්ඝ වීම ඇතුළු කරුණු රැසක් පිළිබඳව සාකච්ඡා කර තිබේ.
සාකච්ඡාවෙන් අනතුරුව මාධ්ය වෙත අදහස් දක්වමින් සම්මේලන සභාපති රුචික ප්රනාන්දු මහතා පැවසුවේ ශිෂ්යයන් විශ්වවිද්යාලවලට ඇතුළත් කර ගැනීම තවදුරටත් සැලකිය යුතු කාලයක් ප්රමාද කිරීමට සිදුවනු ඇති බවට තම සංගමයට වැටහුණු බවයි.
ජනාධිපතිවරයා සමඟ මීට පෙර පැවති සාකච්ඡාවලදී එකඟතාවන්ට පැමිණ තිබූ බවත්, ශිෂ්යයන් ඇතුළත් කර ගැනීම කඩිනම් කිරීම සඳහා විශ්වවිද්යාල ප්රතිපාදන කොමිෂන් සභාව සහ උපකුලපතිවරුන්ගේ කමිටුව විසින් යෝජනා ඉදිරිපත් කර තිබූ බවත් ඔහු සඳහන් කළේය.
කෙසේ වෙතත්, එම යෝජනා තවමත් ජනාධිපති ලේකම් කාර්යාලයට ලැබී නොමැති බව අග්රාමාත්යවරිය ඊයේ පැවති සාකච්ඡාවේදී තමන්ට දැනුම් දුන් බව ප්රනාන්දු මහතා පැවසීය.
“අපි පුදුමයට පත්වුණා. වසරක් පමණ තිස්සේ අපි බලා සිටින මෙවැනි වැදගත් කාරණයක් තවමත් අදාළ ස්ථානයට ගිහින් නැහැ,” යනුවෙන් ඔහු සඳහන් කළේය.
සම්මේලන ලේකම් ජ්යෙෂ්ඨ කථිකාචාර්ය චාරුදත්ත ඉලංගසිංහ මහතා පැවසුවේ රට පුරා විශ්වවිද්යාල නියෝජනය කරමින් ආචාර්යවරුන් මෙම සාකච්ඡාවට සහභාගී වූ බවයි.
රාත්රී 10.00 පමණ දක්වා සාකච්ඡාව පැවති බව සඳහන් කළ ඔහු, විශ්වවිද්යාල පද්ධතියේ පවතින අර්බුදයට කඩිනමින් විසඳුමක් ලබාදීමේ අවශ්යතාව එමගින් පැහැදිලි වන බවද පැවසීය.
රජයට අධ්යාපනය සම්බන්ධයෙන් ප්රමාණවත් උනන්දුවක් නොමැති බවටද ඉලංගසිංහ මහතා චෝදනා කළේය.
“මේ වගේ සාකච්ඡා පිදුරු ගොඩක ඉඳිකටු හොයනවා වගේ. රජයට අධ්යාපනය ගැන කතා කරන්න බැහැ, මොකද ඒ ගැන උනන්දුවක් නැහැ. ඉදිරියේදී ගත යුතු ක්රියාමාර්ග පිළිබඳව අපි අනිවාර්යයෙන්ම තීරණයක් ගන්නවා,” යනුවෙන් ඔහු පැවසීය.
වහාම පියවර නොගතහොත් විශ්වවිද්යාල සඳහා ශිෂ්යයන් ඇතුළත් කර ගැනීම තවදුරටත් ප්රමාද වනු ඇති බවට සම්මේලන අනතුරු අඟවයි. එම තත්ත්වය දැනටමත් පීඩනයකට ලක්ව ඇති මෙරට උසස් අධ්යාපන පද්ධතියේ ගැටලු තවදුරටත් උග්ර කිරීමට හේතුවනු ඇති බවද එම සංගමය පෙන්වා දෙයි.
