හිටපු ජනාධිපති චන්ද්රිකා බණ්ඩාරනායක කුමාරතුංග මහත්මිය රාජ්ය වගකීම් සහ මව්පිය වගකීම් සමබර කරගත් ආකාරය පිළිබඳව අදහස් දක්වමින්, තමන් දිනකට පැය 15ක් පමණ වැඩ කළ අවස්ථා තිබූ බවත්, දැඩි සැලසුම් සහගත බවකින් පෞද්ගලික ජීවිතය හා රාජකාරි කටයුතු කළමනාකරණය කළ බවත් පවසා තිබේ.
මහජන උත්සවයකදී අදහස් දක්වමින් ඇය සඳහන් කළේ, උදෑසන 7.30ට දරුවන් පාසලට යැවීමෙන් අනතුරුව තම වැඩ කටයුතු ආරම්භ කර රාත්රිය වන තුරු ඒවායේ නිරත වූ බවයි.
“එලෙස වැඩ කිරීම අසීරු වුණා. නමුත් අපට එය කරන්න සිදුවුණා. මොකද අපි අපටම තබාගත් ඉලක්ක ඉටුකර ගැනීම අසීරු සහ අභියෝගාත්මක ඒවා වූ අතර, ඒවා ඉටු කිරීමට මම අධිෂ්ඨාන කරගෙන සිටියා,” යනුවෙන් ඇය පැවසුවාය.
මූල්යමය සීමාවන් පැවතියද, නිවසේ වගකීම් කළමනාකරණය කරගැනීම සඳහා ඉඩම් විකිණීම ඇතුළු ක්රම භාවිත කළ බවත්, රාජ්ය පාලන කටයුතු සඳහා කාර්යක්ෂම නිලධාරීන්ගේ සහාය ලබාගත් බවත් කුමාරතුංග මහත්මිය සඳහන් කළාය.
තම ඥාතීන්ට රජයේ රැකියා හෝ තනතුරු ලබා නොදුන් බවද ඇය අවධාරණය කළ අතර, තමන් විශ්වාස කළ එක් ගෘහ සේවිකාවකට පමණක් එවැනි අවස්ථාවක් ලබාදී තිබූ බව සඳහන් කළාය. අනෙකුත් පත්වීම් සිදුකර ඇත්තේ හැකියාව සහ පළපුරුද්ද පදනම් කරගෙන බවද ඇය පැවසුවාය.
දරුවන් ඇති දැඩි කළ ආකාරය පිළිබඳව අදහස් දක්වමින් හිටපු ජනාධිපතිනිය සඳහන් කළේ, තම දරුවන් ඉහළම මට්ටමේ අධ්යාපනයක් ලබාගෙන ඇති අතර දූෂණ හෝ අපකීර්තියකින් තොරව ජීවත් වීම පිළිබඳව තමන් ආඩම්බර වන බවයි.
“ඔබට ඉතා දුෂ්කර සහ අභියෝගාත්මක රැකියාවක් කළ හැකියි. අසීරු වේලාවන්හිදී වැඩ කළ හැකියි. නමුත් ඔබේ රාජකාරි ජීවිතය සහ පෞද්ගලික ජීවිතය නිසි ලෙස සංවිධානය කරගත හැකි නම්, ඔබේ දරුවන්ට යහපත් මිනිසුන් බවට පත්වීමට අවශ්ය වටිනාකම් සහ සුදුසු පරිසරය ලබාදීමට තවමත් හැකියාව තිබෙනවා,” යනුවෙන් ඇය පැවසුවාය.
තමන් කන්යාරාම පාසලක අධ්යාපනය ලැබීමත්, තම දෙමාපියන්ගේ හැසිරීම් සහ ජීවන රටාව නිරීක්ෂණය කිරීමත් තම වටිනාකම් ගොඩනැගීමට බලපෑ බවද කුමාරතුංග මහත්මිය සඳහන් කළාය. එම වටිනාකම් පසුව තම දරුවන් වෙතද ලබාදීමට හැකි වූ බව ඇය පැවසුවාය.
