සෞදි අරාබියේදී මරණ දඬුවමකට මුහුණ දී සිටින ශ්රී ලාංකික තරුණයෙකු වන අනෝජන් සිවරාස මහතා නිදහස් කර ගැනීම සඳහා ශ්රී ලංකාවේ ප්රදේශ කිහිපයක විරෝධතා සහ අත්සන් ව්යාපාර පවත්වා තිබේ.
හැටන් නගරයේ මල්ලියප්පු මංසන්ධියේදී විරෝධතාවක් පවත්වා ඇති අතර, අනෝජන්ගේ උපන් ප්රදේශය වන අම්පාර නට්පිටිමුනෙයි ප්රදේශයේදී ඔහු නිදහස් කර ගැනීම සඳහා අත්සන් ව්යාපාරයක් ආරම්භ කර ඇත.
අනෝජන්ගේ නිදහස තහවුරු කර ගැනීම සඳහා සුදුසු රාජ්ය තාන්ත්රික ක්රියාමාර්ග ගන්නා ලෙස ඉල්ලා සකස් කරන පෙත්සම විදේශ කටයුතු අමාත්යාංශයට භාරදීමට කටයුතු කරන බව සංවිධායකයන් සඳහන් කර තිබේ.
සෞදි අරාබියේ සේවය කරමින් සිටියදී අනෝජන් විසින් සමාජ මාධ්ය ඔස්සේ පළ කළ බව කියන ප්රකාශයක් සම්බන්ධයෙන් මෙම නඩුව පැන නැගී තිබේ. එම ප්රකාශය ඉස්ලාම් ආගමට සහ නබි මුහම්මද්තුමාට අපහාසයක් ලෙස සලකා ඇති බව වාර්තා වේ.
අනෝජන්ගේ පවුලේ සාමාජිකයන් පවසන්නේ ශ්රී ලංකාවේ විවිධ ආගමික ප්රජාවන් අතර පැවති අන්තර්ජාල ආරවුලක් අතරතුර එම ප්රකාශය සිදු වූ බවයි.
ජූලි 15 වැනිදා සෞදි අධිකරණයක් විසින් අනෝජන්ට වසර පහක සිර දඬුවමක් සහ සෞදි රියාල් මිලියන 3ක දඩයක් නියම කර තිබේ.
ශ්රී ලංකා විදේශ කටයුතු අමාත්යාංශයේ සහාය ඇතිව ඔහුගේ නීතිඥවරයා එම තීන්දුවට එරෙහිව අභියාචනයක් ඉදිරිපත් කරමින් දඬුවම අඩු කරන ලෙස ඉල්ලා තිබේ.
කෙසේ වෙතත්, පසුව එම දඬුවම මරණ දඬුවමක් දක්වා ඉහළ නංවා ඇති බවට දැනුම් දී ඇති බව අනෝජන්ගේ පවුලේ සාමාජිකයෝ පවසති.
මේ අතර, විපක්ෂයේ මන්ත්රීවරුන් සහ හිටපු මන්ත්රීවරුන් කිහිපදෙනෙකුද අනෝජන් සම්බන්ධයෙන් රජය මැදිහත් වී ඔහු නිදහස් කර ගැනීමට අවශ්ය පියවර ගන්නා ලෙස ඉල්ලා තිබේ.
කෙසේ වෙතත්, රජය පවසා ඇත්තේ අනෝජන් සම්බන්ධයෙන් අවශ්ය ක්රියාමාර්ග මේ වනවිටත් ගෙන ඇති බවයි.
