ශ්රී ලංකා රේගුව සිය පළමු කඩදාසි රහිත රේගු ප්රකාශන පද්ධතිය ඔක්තෝබර් 1 වැනිදා නිල වශයෙන් හඳුන්වාදීමට නියමිතය.
මෙය රේගු ක්රියා පටිපාටි සහ වෙළෙඳ ප්රජාව වෙත ලබාදෙන සේවාවන් ඩිජිටල්කරණය කිරීමේ ක්රියාවලියේ වැදගත් පියවරක් බව ශ්රී ලංකා රේගුව සඳහන් කරයි.
නව පද්ධතිය හරහා රේගු ප්රකාශන සහ ඊට අදාළ ලේඛන විද්යුත් ආකාරයෙන් ඉදිරිපත් කර සැකසීමට හැකි වන අතර, භෞතික ලේඛන, අතින් සිදුකරන කටයුතු සහ කඩදාසි ගොනු එක් ස්ථානයක සිට තවත් ස්ථානයකට රැගෙන යාම මත පවතින අවශ්යතාව අවම වනු ඇත.
මෙම පද්ධතිය හඳුන්වාදීමෙන් රේගු ප්රකාශන සැකසීමේ වේගය වැඩි කිරීමටත්, විනිවිදභාවය සහ ලේඛන සොයාගැනීමේ හැකියාව වැඩිදියුණු කිරීමටත්, පරිපාලන ප්රමාද අවම කිරීමටත් හැකි වනු ඇතැයි රේගුව පවසයි.
එමෙන්ම අවදානම් මත පදනම් වූ රේගු පාලනය වඩාත් කාර්යක්ෂමව ක්රියාත්මක කිරීමට, රජයේ ආදායම් ආරක්ෂා කිරීමට, නියාමන අනුකූලතාව තහවුරු කිරීමට සහ වෙළෙඳ පහසුකම් සැලසීමටද මෙම පද්ධතිය උපකාරී වනු ඇත.
කඩදාසි භාවිතය අවම කිරීම හේතුවෙන් වඩාත් පරිසර හිතකාමී කාර්ය පරිසරයක් නිර්මාණය කිරීමටද මෙය දායක වනු ඇති බව ශ්රී ලංකා රේගුව සඳහන් කළේය.
නව පද්ධතිය හඳුන්වාදීමත් සමඟ නවීන ජාත්යන්තර වෙළෙඳාමේ අවශ්යතාවලට ගැළපෙන වඩාත් කාර්යක්ෂම, විනිවිදභාවයෙන් යුතු, ආරක්ෂිත සහ තාක්ෂණය මත පදනම් වූ රේගු පරිපාලනයක් ගොඩනැගීමේ ක්රියාවලිය තවදුරටත් ශක්තිමත් වනු ඇතැයි අපේක්ෂා කෙරේ.
මෙම පද්ධතිය සාර්ථකව හඳුන්වාදීමට ශ්රී ලංකා රේගු නිලධාරීන් සහ තාක්ෂණික කණ්ඩායම්, රාජ්ය ආයතන, වෙළෙඳ ප්රජාව, රේගු නිෂ්කාශන නියෝජිතයන් සහ භාණ්ඩ ප්රවාහන ක්ෂේත්රයේ හවුල්කරුවන් දැක්වූ දායකත්වය ඉවහල් වූ බවද ශ්රී ලංකා රේගුව සඳහන් කළේය.
නව කඩදාසි රහිත රේගු ප්රකාශන පද්ධතිය ඔක්තෝබර් 1 වැනිදා කොළඹ ශ්රී ලංකා රේගු ශ්රවණාගාරයේදී නිල වශයෙන් දියත් කිරීමට නියමිතය.
