බුද්ධිමය දේපළ අයිතිවාසිකම් ආරක්ෂා කිරීමේ අරමුණින් විවාහ මංගල්ය, සාද, ආයතනික උත්සව, DJ සංදර්ශන මෙන්ම බැංකු සහ සුපිරි වෙළෙඳසැල් ඇතුළු ස්ථානවල සංගීතය වාදනය කිරීම සඳහා බලපත්රයක් ලබාගැනීම අනිවාර්ය කරමින් නව රෙගුලාසි ගැසට් කර තිබේ.
ජාතික බුද්ධිමය දේපළ කාර්යාලය යටතේ ශ්රී ලංකා නිර්මාණකරුවන් සහ ප්රකාශකයන්ගේ සංගමය (ACPOSL) විසින් හඳුන්වාදී ඇති මෙම රෙගුලාසි පසුගිය අඟහරුවාදා සිට ක්රියාත්මක වී තිබේ.
සංගීත වැඩසටහන් පැවැත්වීම සඳහා බලපත්ර ලබාගත යුතු බවට හෝටල් සහ ආයතන වෙත දැනුම් දී ඇති අතර, සහභාගී වන පිරිස අනුව බලපත්ර ගාස්තු රුපියල් 20,000 සිට රුපියල් 125,000 දක්වා වෙනස් වේ.
මූලික වශයෙන් මෙම බලපත්ර ක්රමය සංගමය නියෝජනය කරන ශ්රී ලාංකික සංගීත නිර්මාණ සහ ඉන්දියානු Performing Rights Society (IPRS) හරහා නියෝජනය වන හින්දි සහ දෙමළ සංගීත නිර්මාණ සඳහා අදාළ වේ.
ඉංග්රීසි හෝ වෙනත් විදේශීය භාෂාවලින් පමණක් යුත් සංගීතය භාවිත කරන උත්සව සඳහා මෙම බලපත්රය අවශ්ය නොවන බව සඳහන් වේ.
ශ්රී ලංකා නිර්මාණකරුවන් සහ ප්රකාශකයන්ගේ සංගමය පවසන්නේ මෙම බලපත්ර අවශ්යතාව විවාහ මංගල්ය සහ පිළිගැනීම්, පෞද්ගලික සාද, ආයතනික උත්සව, රාත්රී භෝජන සහ නර්තන උත්සව, සම්මාන උළෙල, නිෂ්පාදන හඳුන්වාදීම්, ප්රවර්ධන වැඩසටහන්, සංගීත විනෝදාස්වාදය සහිත සම්මන්ත්රණ, DJ සංදර්ශන, සජීවී සංගීත ප්රසංග, දෙමුහුන් වැඩසටහන්, ප්රසංග සහ සංගීතය කේන්ද්ර කරගත් වෙනත් වැඩසටහන් රැසකට අදාළ වන බවයි.
DJ වැඩසටහන් සඳහා පුද්ගලයන් 100කට අඩු පිරිසක් සහභාගී වන්නේ නම් රුපියල් 20,000ක්ද, 100ත් 300ත් අතර නම් රුපියල් 30,000ක්ද, 300කට වැඩි නම් රුපියල් 40,000ක්ද ගාස්තු ලෙස අය කෙරේ.
එම පිරිස් ප්රමාණය අනුව සජීවී සංගීත වැඩසටහන් සඳහා පිළිවෙළින් රුපියල් 25,000ක්, රුපියල් 35,000ක් සහ රුපියල් 50,000ක් අය කෙරේ.
පෞද්ගලික හෝ ආයතනික DJ වැඩසටහන් සඳහා රුපියල් 25,000, 40,000 සහ 50,000ක්ද, දෙමුහුන් හෝ ආයතනික සජීවී සංගීත වැඩසටහන් සඳහා රුපියල් 50,000, 75,000 සහ 125,000ක්ද අය කෙරෙන බව සඳහන් වේ.
Sunday Times පුවත්පතට අදහස් දක්වමින් ශ්රී ලංකා නිර්මාණකරුවන් සහ ප්රකාශකයන්ගේ සංගමය සභාපති නිලාර් එන්. කාසිම් මහතා පැවසුවේ රචකයන්, ගී පද රචකයන් සහ ප්රකාශකයන් වෙත ඔවුන්ට හිමි කර්තෘභාග නිසි පරිදි බෙදාහැරීම සහතික කිරීම මෙම රෙගුලාසි හඳුන්වාදීමේ ප්රධාන අරමුණක් බවයි.
ගායකයන්ට සාපේක්ෂව බොහෝ අවස්ථාවල නිර්මාණකරුවන්ගේ නම් ප්රමාණවත් ලෙස සඳහන් නොවන බවද ඔහු පෙන්වා දී තිබේ. මෙම ක්රමය මූලික වශයෙන් වාණිජ මට්ටමින් සංවිධානය කරන උත්සව ඉලක්ක කරගන්නා අතර, ඇතැම් අවස්ථාවල කුඩා පරිමාණයේ කලාකරුවන් සඳහා සහන ලබාදෙන බවද ඔහු සඳහන් කර ඇත.
නව රෙගුලාසි අනුව බලපත්රයක් නොමැතිව උත්සවයක් පැවැත්වීමට හෝටල්වලට අවසර දිය නොහැකිය. එමෙන්ම වැඩසටහන අවසන් වූ පසු එහි වාදනය කළ සංගීතය හඳුනාගැනීම සඳහා ශ්රව්ය පටිගත කිරීමක්ද සංවිධායකයන් විසින් ලබාදිය යුතුය.
මෙම බලපත්ර ක්රමය සුපිරි වෙළෙඳසැල්, බැංකු, සිල්ලර වෙළෙඳසැල්, සාප්පු සංකීර්ණ, සිනමා ශාලා සහ කාර්යාල ගොඩනැගිලි සඳහාද අදාළ වේ.
බස් රථ, සංචාරක බස් රථ, සංචාරක වෑන් රථ සහ මගී දුම්රිය ඇතුළු ප්රවාහන සේවාවල සංගීතය වාදනය කිරීමද මෙම බලපත්ර ක්රමයට ඇතුළත් කර තිබේ.
වාණිජ පරිශ්ර සඳහා වාර්ෂික බලපත්ර නිකුත් කිරීමට නියමිත අතර, එහි ගාස්තු පරිශ්රයේ විශාලත්වය සහ අදාළ පළාත් පාලන ආයතන බල ප්රදේශය අනුව වෙනස් වන
