රාජ්ය විශ්වවිද්යාල පද්ධතියේ පවතින අර්බුදය සම්බන්ධයෙන් අග්රාමාත්ය හරිනි අමරසූරිය මහත්මිය සමඟ පැවති සාකච්ඡාව විසඳුමකින් තොරව අවසන් වීම හේතුවෙන් ඉදිරියේදී දැඩි වෘත්තීය ක්රියාමාර්ග ගන්නා බව විශ්වවිද්යාල ආචාර්යවරුන්ගේ සම්මේලනය (FUTA) අනතුරු අඟවා තිබේ.
විශ්වවිද්යාල ආචාර්යවරුන්ගේ සම්මේලන උප සභාපති මහාචාර්ය අරුණ වන්නිනායක මහතා පැවසුවේ පසුගිය සතියේ විශ්වවිද්යාල පරිශ්ර ඉදිරිපිට පැවති විරෝධතාවලින් අනතුරුව ඉදිරි වෘත්තීය ක්රියාමාර්ග සම්බන්ධයෙන් මේ වනවිට සාමාජිකයන් සමඟ සාකච්ඡා කරමින් සිටින බවයි.
සුදුසුකම් ලත් ආචාර්යවරුන් බඳවා ගැනීම සහ ඔවුන් සේවයේ රඳවා ගැනීම සම්බන්ධයෙන් පවතින දිගුකාලීන ගැටලු විශ්වවිද්යාල පද්ධතියට අඛණ්ඩව බලපාන බවද ඔහු පෙන්වා දුන්නේය.
අග්රාමාත්යවරිය සමඟ මෙම සාකච්ඡාව බදාදා බත්තරමුල්ලේ අධ්යාපන අමාත්යාංශයේදී පැවති අතර, එහිදී සම්මේලන නියෝජිතයන් විසින් සිසුන් බඳවා ගැනීම ප්රමාද වීම, අධ්යයන කාලය දීර්ඝ වීම සහ අධ්යයන කාර්ය මණ්ඩල හිඟය සම්බන්ධයෙන් කරුණු ඉදිරිපත් කර තිබේ.
සම්මේලන ලේකම් ආචාර්ය චරුදත්ත ඉලංගසිංහ මහතා සඳහන් කළේ සාකච්ඡාවේදී කිසිදු එකඟතාවකට පැමිණීමට නොහැකි වූ බවයි. මෙම ගැටලු විසඳීමට රජය ප්රමාණවත් උනන්දුවක් නොදක්වන බවටද ඔහු චෝදනා කළේය.
සම්මේලන සභාපති මහාචාර්ය රුචිකා ප්රනාන්දු මහත්මිය පැවසුවේ විශ්වවිද්යාලවලට සිසුන් කඩිනමින් බඳවා ගැනීම සඳහා ජනාධිපතිවරයා සමඟ මීට පෙර ඇතිකරගත් එකඟතා මෙන්ම විශ්වවිද්යාල ප්රතිපාදන කොමිෂන් සභාව සහ උපකුලපතිවරුන්ගේ කමිටුව විසින් ඉදිරිපත් කළ යෝජනාද තවමත් ජනාධිපති ලේකම් කාර්යාලයට ලැබී නොමැති බවයි.
එවැනි වැදගත් යෝජනා සම්බන්ධයෙන් මෙතෙක් කිසිදු ක්රියාමාර්ගයක් ගෙන නොතිබීම පිළිබඳව තමන් පුදුමයට පත්වන බව මහාචාර්ය ප්රනාන්දු මහත්මිය සඳහන් කළාය.
මෙම ගැටලු සම්බන්ධයෙන් රජයේ ක්රියාමාර්ගයක් බලාපොරොත්තුවෙන් සම්මේලනය වසරකට ආසන්න කාලයක් බලා සිටින බවද ඇය පැවසුවාය.
වහාම අවශ්ය පියවර නොගන්නේ නම් වෘත්තීය සමිති ක්රියාමාර්ග තවදුරටත් දැඩි කරමින් සිය ව්යාපාරය ඉදිරියට ගෙන යන බව සම්මේලනය අවධාරණය කර තිබේ.
