හම්බන්තොට වරායේ මේ වන විට රඳවා ඇති ආනයනය කළ වාහන 1,025ක් ආනයනකරුවන් විසින් මෙතෙක් නිදහස් කරගෙන නොමැති බව ශ්රී ලංකා රේගුව පවසයි.
ශ්රී ලංකා රේගු මාධ්ය ප්රකාශක චන්දන පුංචිහේවා මහතා සඳහන් කළේ, මෙම වාහන අතරින් 625ක් පමණ මෙරටට ගෙන්වා මාස හයකට වැඩි කාලයක් ගතවී තිබියදීත් තවමත් වරායෙන් නිදහස් කරගෙන නොමැති බවයි.
මෙම වාහන කිසිදු රේගු නීති උල්ලංඝනයකට සම්බන්ධ නොවන බවද ඔහු අවධාරණය කළේය. කෙසේ වෙතත්, ආනයනකරුවන් ඒවා නිදහස් කරගෙන නොමැති බැවින් රේගු ආඥා පනතේ 129 වැනි වගන්තිය යටතේ එම වාහන වෙන්දේසි කිරීම හෝ ටෙන්ඩර් ක්රමය යටතේ අලෙවි කිරීම සඳහා කටයුතු කරන බවද ඔහු පැවසීය.
පුංචිහේවා මහතා පැවසුවේ, ආනයනය කරන ලද සියලු භාණ්ඩ අදාළ බදු සහ ගාස්තු ගෙවීමෙන් පසු මාසයක් ඇතුළත නිදහස් කරගත යුතු බවයි. එසේ නොකළහොත්, එම භාණ්ඩ විකිණීමෙන් ලැබෙන මුදලින් රජයට ගෙවිය යුතු බදු අයකර ගැනීමට රේගුවට නීතිමය බලය ඇති බවද ඔහු සඳහන් කළේය.
බදු මුදල් අයකර ගැනීමෙන් පසු ඉතිරි වන මුදල වරාය සහ ගබඩා ගාස්තු පියවීම සඳහා යොදවන අතර, එයින්ද පසුව ඉතිරි වන මුදල අදාළ ආනයනකරුට ආපසු ලබාදෙන බවද ඔහු පැවසීය.
වරායට ගෙන්වා ඇති භාණ්ඩ මාසයකට වැඩි කාලයක් නිදහස් නොකර රඳවා තිබේ නම් ඒ පිළිබඳව ශ්රී ලංකා රේගුවට දැනුම් දීම වරාය බලධාරීන්ගේ වගකීම බවද රේගු මාධ්ය ප්රකාශකවරයා සඳහන් කළේය.
මෙම වාහන සම්බන්ධයෙන් දැනටමත් රේගුවට දැනුම් දී ඇති අතර, ඒවා සම්බන්ධයෙන් නීතිමය පියවර ගෙන විකිණීමේ කටයුතු ඉදිරියේදී සිදුකරන බවද ඔහු පැවසීය.
කෙසේ වෙතත්, වාහනයක් නියමිත කාලය තුළ නිදහස් කරගැනීමට නොහැකි වූයේ මන්දැයි ආනයනකරුවෙකු සාධාරණ හේතුවක් ඉදිරිපත් කරන්නේ නම්, ඒ සම්බන්ධයෙන් එක් එක් සිද්ධිය වෙන වෙනම සලකා බැලීමට රේගුව සූදානම් බවද චන්දන පුංචිහේවා මහතා වැඩිදුරටත් සඳහන් කළේය.
