ශ්රී ලංකා විදේශ ගමන් බලපත්රය ලෝකයේ 169 වැනි ස්ථානයට පත්ව ඇති බව, ලොව පුරා විදේශ ගමන් බලපත්රවල ශක්තිය සහ වීසා ප්රවේශය පිළිබඳ දත්ත නිරීක්ෂණය කරන ස්වාධීන වේදිකාවක් වන Passport Reports පළ කළ දත්ත අනුව වාර්තා වේ.
ශ්රී ලංකා විදේශ ගමන් බලපත්රයට 53ක Mobility Score අගයක් හිමිව ඇති අතර, එහි හිමිකරුවන්ට රටවල් 15කට වීසා රහිතව ගමන් කළ හැකිය.
තවත් ගමනාන්ත 34කට පැමිණීමේදී වීසා ලබාගත හැකි අතර, රටවල් 4කට විද්යුත් සංචාරක අවසර පත්රය හෙවත් ETA මගින් ඇතුළුවිය හැකිය.
කෙසේ වෙතත්, ගමනාන්ත 145ක් සඳහා ශ්රී ලාංකිකයන්ට පූර්ව වීසා ලබාගැනීම අනිවාර්ය වන අතර, එමඟින් ජාත්යන්තර සංචරණයේදී ශ්රී ලාංකිකයන් මුහුණ දෙන සීමාවන් පැහැදිලි වේ.
කලාපයේ සහ ලොව අනෙකුත් රටවල විදේශ ගමන් බලපත්ර සමඟ සැසඳීමේදීද සැලකිය යුතු වෙනස්කම් දක්නට ලැබේ. ඉන්දියාව 131 වැනි ස්ථානයේත්, චීනය 97 වැනි ස්ථානයේත්, රුසියාව 75 වැනි ස්ථානයේත්, පාකිස්තානය 183 වැනි ස්ථානයේත් පසුවෙයි.
Mobility Score 175ක් සහිත ලිබියාවද ශ්රී ලංකාව ආසන්නයේ ශ්රේණිගත වී ඇති අතර, එයද සමාන සංචරණ සීමාවන් පවතින බව පෙන්වා දෙයි.
ලෝක ශ්රේණිගත කිරීමේ ඉහළින්ම එක්සත් අරාබි එමීර් රාජ්යය පසුවන අතර, සිංගප්පූරුව දෙවැනි ස්ථානයේත්, ස්පාඤ්ඤය තෙවැනි ස්ථානයේත්, මැලේසියාව සිව්වැනි ස්ථානයේත්, ලක්සම්බර්ග් පස්වැනි ස්ථානයේත් පසුවෙයි.
මෙම රටවල විදේශ ගමන් බලපත්ර හිමියන්ට වීසා රහිතව හෝ පැමිණීමේදී වීසා ලබාගැනීමේ හැකියාව සහිත පුළුල් ගමනාන්ත ප්රමාණයක් හිමිවීම හේතුවෙන් ඒවා ලොව වැඩි ජාත්යන්තර සංචරණ හැකියාවක් සහිත විදේශ ගමන් බලපත්ර ලෙස සැලකේ.
ශ්රී ලංකාවට ආසන්න ශ්රේණිගත කිරීම්වල නේපාලය 171 වැනි ස්ථානයේත්, මියන්මාරය 168 වැනි ස්ථානයේත්, ඉතියෝපියාව 173 වැනි ස්ථානයේත් පසුවෙයි. ඊට වෙනස්ව ප්රංශය 6 වැනි ස්ථානයේත්, නෝර්වේ 7 වැනි ස්ථානයේත් පසුවන අතර, එම රටවල විදේශ ගමන් බලපත්ර හිමියන්ට වඩා පුළුල් සංචරණ නිදහසක් හිමිව තිබේ.
Passport Reports යනු ලොව පුරා විදේශ ගමන් බලපත්රවල ශක්තිය සහ ජාත්යන්තර සංචරණ හැකියාව පිළිබඳ ප්රායෝගික හා විනිවිදභාවයෙන් යුත් තොරතුරු ලබාදීම අරමුණු කරගත් ස්වාධීන ගෝලීය සංචරණ වේදිකාවකි.
එම වේදිකාව එක් ශ්රේණිගත කිරීමේ අංකයකට පමණක් විදේශ ගමන් බලපත්රයක හැකියාව සීමා නොකර, වීසා රහිත ප්රවේශය, පැමිණීමේදී ලබාගත හැකි වීසා, විද්යුත් සංචාරක අවසර පත්ර සහ පූර්ව වීසා අවශ්ය ගමනාන්ත වෙන වෙනම දක්වයි.
ඒ අනුව, විදේශ ගමන් බලපත්රයකින් සැබෑ සංචාරක තත්ත්වයන් යටතේ ලබාගත හැකි ප්රවේශය පිළිබඳ වඩාත් පැහැදිලි අවබෝධයක් පරිශීලකයන්ට ලබාදීම එහි අරමුණ වී තිබේ.
