වෛද්ය නෙවිල් ප්රනාන්දු රෝහලේ මෙහෙයුම් කටයුතු ශ්රී ලංකා ගුවන් හමුදාව යටතට පත් කරමින්, මිශ්ර මෙහෙයුම් ආකෘතියක් සහ සමාගම් පනත යටතේ පිහිටුවන රාජ්ය ව්යවසායක් මගින් රෝහල පරිපාලනය කිරීම සඳහා නව කළමනාකරණ ක්රමවේදයක් ක්රියාත්මක කිරීමට කැබිනට් මණ්ඩලය අනුමැතිය ලබාදී තිබේ.
2017 වසරේදී මෙම රෝහල සෞඛ්ය අමාත්යාංශය යටතට පත් කිරීමට කැබිනට් මණ්ඩලය මීට පෙර අනුමැතිය ලබාදී තිබිණි.
2026 පෙබරවාරි 9 වැනිදා පැවති කැබිනට් රැස්වීමේදී මුදල් අමාත්යාංශය, ආරක්ෂක අමාත්යාංශය, සෞඛ්ය අමාත්යාංශය සහ ශ්රී ලංකා ගුවන් හමුදාව එක්ව ඉදිරිපත් කළ යෝජනාවක් අනුමත කරමින් රෝහල සඳහා හවුල් කළමනාකරණ සහ පාලන ව්යුහයක් ස්ථාපිත කිරීමට තීරණය කර තිබේ.
නව ක්රමවේදය යටතේ රෝහලේ හිමිකාරිත්වය සහ වත්කම් මහා භාණ්ඩාගාරය සතු සියයට 100ක කොටස් හිමිකාරිත්වයක් සහිත සමාගමකට පවරනු ඇත. එහි කළමනාකරණ කටයුතු ශ්රී ලංකා ගුවන් හමුදාව විසින් සිදු කිරීමට නියමිතය.
භාණ්ඩාගාර ලේකම්වරයා විසින් ආරක්ෂක අමාත්යාංශයේ නිර්දේශ මත සාමාජිකයන් 11 දෙනෙකුගෙන් සමන්විත අධ්යක්ෂ මණ්ඩලයක් පත් කිරීමට නියමිතය.
2026 සිට 2028 දක්වා කාලය තුළ රෝහලේ කාර්ය මණ්ඩල වැටුප් සහ මෙහෙයුම් වියදම් සඳහා මහා භාණ්ඩාගාරය මගින් මුදල් ලබාදීමට නියමිත අතර, ඉන් අනතුරුව රෝහල ස්වයං මූල්යකරණ ආයතනයක් ලෙස පවත්වාගෙන යාමට සැලසුම් කර තිබේ.
එමෙන්ම ජනතාවට නොමිලේ ලබාදෙන සෞඛ්ය සේවා සඳහා අවශ්ය ඖෂධ, වෛද්ය සැපයුම් සහ පරිභෝජන ද්රව්ය වෙනුවෙන් වාර්ෂිකව රුපියල් මිලියන 125ක මුදලක් සෞඛ්ය හා ජනමාධ්ය අමාත්යාංශයට වෙන් කරන ප්රතිපාදන හරහා ලබාදීමටද නියමිතය.
රජය සඳහන් කරන්නේ නව කළමනාකරණ ක්රමවේදය යටතේද වෛද්ය නෙවිල් ප්රනාන්දු රෝහලේ නේවාසික ප්රතිකාර සහ බාහිර රෝගී ප්රතිකාර සේවා අඛණ්ඩව පවත්වාගෙන යන බවයි.
එම සේවා නොමිලේ මෙන්ම ගාස්තු අය කිරීමේ පදනම මතද ලබාදීමට නියමිතය.
