ශ්රී ලාංකික ආරම්භක සමාගමක් වන Seahorse Air Ceylon විසින් ශ්රී ලංකාවේ සිරස්ව ගුවන්ගත වී සහ ගොඩබැසිය හැකි (Vertical Take-Off and Landing – VTOL) ගුවන් යානා නිෂ්පාදන පහසුකමක් ස්ථාපිත කිරීම සඳහා යෝජනාවක් ඉදිරිපත් කර තිබේ.
මෙම සමාගමේ නියෝජිතයින් ශ්රී ලංකා සිවිල් ගුවන් සේවා අධිකාරියේ (CAASL) අධ්යක්ෂ ජනරාල් සහ ප්රධාන විධායක නිලධාරී කපිතාන් දමින්ද රඹුක්වැල්ල මහතා හමුවී, නවීන Advanced Air Mobility (AAM) ක්ෂේත්රය කේන්ද්ර කරගනිමින් ගුවන් යානා නිෂ්පාදන හැකියාවන් සංවර්ධනය කිරීමේ සැලසුම් පිළිබඳව කරුණු ඉදිරිපත් කර ඇත.
CAASL සඳහන් කළේ, Seahorse Air Ceylon සමාගම දැනටමත් ශ්රී ලංකා ආයෝජන මණ්ඩලයේ (BOI) ලියාපදිංචි වී ඇති අතර, ව්යාපෘතියේ පර්යේෂණ, සංවර්ධන සහ පරීක්ෂණ අදියර ආරම්භ කිරීම සඳහා අවශ්ය නියාමන අනුමැතීන් ලබාගැනීමේ ක්රියාවලියේ නිරතව සිටින බවයි.
මෙම හමුවේදී CAASL නිලධාරීන් විසින් ව්යාපෘතියේ මුල් අදියරවලදී සපුරාලිය යුතු නියාමන රාමුව, සහතික කිරීමේ ක්රියාවලිය සහ ගුවන් ආරක්ෂණ අවශ්යතා පිළිබඳව පැහැදිලි කර දී ඇත. එම අවශ්යතා ජාතික සහ ජාත්යන්තර ගුවන් සේවා ප්රමිතීන්ට අනුකූලව ක්රියාත්මක කළ යුතු බවද අවධාරණය කර තිබේ.
නව තාක්ෂණයන් හඳුන්වාදීමේදී ගුවන් ආරක්ෂාව, ආරක්ෂක පාලනය සහ නියාමන අධීක්ෂණය පවත්වාගෙන යාමේ වැදගත්කම අවධාරණය කරමින් කපිතාන් රඹුක්වැල්ල මහතා මෙම වැඩසටහන පිළිගෙන තිබේ.
මෙම යෝජිත ව්යාපෘතිය ශ්රී ලංකාවේ ගුවන් සේවා කර්මාන්තයේ සංවර්ධනයට සහ වර්ධනය වෙමින් පවතින Advanced Air Mobility ක්ෂේත්රයට ශ්රී ලංකාවේ දායකත්වය වැඩි කිරීමට හැකියාව ඇති බව CAASL සඳහන් කළේය.
VTOL ගුවන් යානා සැලසුම් කර ඇත්තේ සාම්ප්රදායික ගුවන් ධාවන පථවල අවශ්යතාව අඩු කරමින් සිරස්ව ගුවන්ගත වීමට සහ සිරස්ව ගොඩබැසීමට හැකි ආකාරයටය. කෙටි දුර මගී ප්රවාහනය සහ අනෙකුත් ගුවන් ගමන් සේවා සඳහා මෙම තාක්ෂණය ලොව පුරා වැඩි අවධානයක් දිනා ගනිමින් පවතී.
