කෙසේ වෙතත්, නව ප්‍රතීතන ක්‍රමවේදය හඳුන්වා දී තිබුණද, මේ වන විට ඒ සඳහා සුදුසුකම් ලබා ඇත්තේ දැනටමත් ක්‍රීඩක කළමනාකරණයේ නිරතව සිටි පුද්ගලයන් පමණක් බව ශ්‍රී ලංකා ක්‍රිකට් පරිවර්තන කමිටු සාමාජික රොෂාන් මහානාම මහතා පවසයි.
කොළඹ පැවති ප්‍රවෘත්ති සාකච්ඡාවකදී අදහස් දක්වමින් මහානාම මහතා පැවසුවේ ප්‍රතීතන ක්‍රියාවලියට මේ වන විටත් ක්‍රීඩක කළමනාකරණයේ නිරතව සිටින පිරිස පමණක් ඉදිරිපත්වීම පිළිබඳව තමන් කනගාටු වන බවයි.
“අවාසනාවකට මේ වන විට සුදුසුකම් ලබා තිබෙන්නේ දැනටමත් එම කටයුතුවල නිරතව සිටි අය පමණයි” යැයි පැවසූ ඔහු, නව ප්‍රතිපත්තිය යටතේ ක්‍රීඩක කළමනාකරුවන් ලෙස ලියාපදිංචි වීමට සුදුසුකම් ඇති අනෙකුත් පුද්ගලයන්ගෙන් ද ඉල්ලීම් කළේය.
ශ්‍රී ලංකා ක්‍රිකට් ආයතනයට අනුව, ක්‍රීඩක කළමනාකරුවන් ලෙස ප්‍රතීතනය ලබාගැනීම සඳහා පුද්ගලයන් 30කට ආසන්න පිරිසක් අයදුම් කර තිබේ. එහෙත් නියමිත නිර්ණායක සපුරා සුදුසුකම් ලබා ඇත්තේ පස්දෙනෙකු පමණක් වන අතර, ඔවුන් සියලුදෙනාම මීට පෙර ක්‍රීඩක කළමනාකරණයේ නිරතව සිටි අය වෙති.
මෙම ගිවිසුම් මඟින් අදාළ පුද්ගලයන් ශ්‍රී ලංකා ක්‍රිකට් ආයතනයේ ප්‍රතීතනය ලත් ක්‍රීඩක කළමනාකරුවන් ලෙස නිල වශයෙන් පිළිගැනේ. ඒ අනුව, නිශ්චිත කර ඇති කරුණු සම්බන්ධයෙන් ක්‍රීඩකයන් නියෝජනය කිරීමට ඔවුන්ට අවසර හිමිවන නමුත් ක්‍රිකට් පරිපාලනයට සහ කණ්ඩායම් තේරීම් කටයුතුවලට මැදිහත්වීම සීමා කර තිබේ.
අවබෝධතා ගිවිසුමට අනුව, ක්‍රීඩක ලියාපදිංචි කිරීම්, සංචාරක විධිවිධාන, නවාතැන්, සුබසාධනය, ගිවිසුම්වලට අනුකූලව කටයුතු කිරීම, මාධ්‍ය හමුවලට සහභාගී වීම සහ වාණිජ බැඳීම් සම්බන්ධයෙන් ප්‍රතීතනය ලත් කළමනාකරුවන්ට ශ්‍රී ලංකා ක්‍රිකට් ආයතනය සමඟ සම්බන්ධීකරණ කටයුතු සිදුකළ හැකිය.
එහෙත් ශ්‍රී ලංකා ක්‍රිකට් ආයතනයේ නිලධාරීන්ට, තේරීම් කමිටුවට හෝ වෙනත් ක්‍රිකට් බලධාරීන්ට අනිසි බලපෑම් කිරීමේ අරමුණින් සාමූහික ක්‍රියාමාර්ග සංවිධානය කිරීම හෝ ඒවාට සහභාගී වීම ක්‍රීඩක කළමනාකරුවන්ට මෙන්ම ක්‍රීඩකයන්ට ද ගිවිසුම මඟින් තහනම් කර තිබේ.
නීතිරීති උල්ලංඝනය කිරීම, විෂමාචාර හැසිරීම් හෝ ගිවිසුමේ කොන්දේසි කඩකිරීම් සිදුවුවහොත් කළමනාකරුවන්ගේ ප්‍රතීතනය අත්හිටුවීමට හෝ අවලංගු කිරීමට ද ශ්‍රී ලංකා ක්‍රිකට් ආයතනයට බලය හිමිවේ.
නව ක්‍රමවේදය යටතේ, තමන් නියෝජනය කරන සෑම ක්‍රීඩකයෙකුගෙන්ම ලිඛිත තහවුරු කිරීමක් ක්‍රීඩක කළමනාකරුවන් විසින් ඉදිරිපත් කළ යුතුය. එසේම, එක් ක්‍රීඩකයෙකු වෙනුවෙන් එක් අවස්ථාවකදී පිළිගනු ලබන්නේ එක් ප්‍රතීතනය ලත් කළමනාකරුවෙකු පමණි.
මෙම ප්‍රතිපත්තිය සකස් කිරීමේදී ක්‍රිකට් ඔස්ට්‍රේලියා සහ පාකිස්තාන ක්‍රිකට් පාලක මණ්ඩලය ක්‍රියාත්මක කරන සමාන නියාමන ක්‍රමවේද අධ්‍යයනය කළ බව මහානාම මහතා පැවසීය.
“අපි ක්‍රිකට් ඔස්ට්‍රේලියා සහ පාකිස්තාන ක්‍රිකට් පාලක මණ්ඩලයේ ප්‍රතිපත්ති ලබාගත්තා. ඒ දෙකම අධ්‍යයනය කිරීමෙන් පසුව ශ්‍රී ලංකාවට ගැළපෙන ප්‍රතිපත්තියක් සකස් කළා” යැයි ඔහු සඳහන් කළේය.
කමිටුවේ සාමාජිකයන් සහ එහි නීති නියෝජිතයන් ශ්‍රී ලංකා ක්‍රිකට් ආයතනයේ නීති අංශය හා ජාත්‍යන්තර අංශය සමඟ එක්ව ගිවිසුම අවසන් කිරීමට කටයුතු කළ බව ද මහානාම මහතා පැවසීය.
මෙම අවබෝධතා ගිවිසුම්වලට සති දෙකකට පමණ පෙර අත්සන් තැබූ බව ද ඔහු අනාවරණය කළේය.
මේ අතර, කමිටු සාමාජිකයෙකු මෙන්ම හිටපු ශ්‍රී ලංකා ක්‍රිකට් ක්‍රීඩකයෙකු ද වන සිදත් වෙත්තමුණි මහතා අනතුරු ඇඟවූයේ ක්‍රීඩක කළමනාකරුවන් ක්‍රිකට් සම්බන්ධ කරුණුවලට, විශේෂයෙන් කණ්ඩායම් තේරීම්වලට මැදිහත් නොවිය යුතු බවයි.
“ක්‍රීඩකයන්ට අපි කියා තිබෙනවා ඔවුන්ගේ කළමනාකරුවන් ක්‍රිකට් ආයතනයට රැගෙන එන්න එපා කියලා. ඔවුන් අපෙන් ඈත් කර තබාගන්න” යැයි වෙත්තමුණි මහතා පැවසීය.
ක්‍රීඩකයන් පෞද්ගලික කළමනාකරුවන් පත්කර ගැනීම සම්බන්ධයෙන් ශ්‍රී ලංකා ක්‍රිකට් ආයතනයට විරෝධයක් නොමැති නමුත්, ඔවුන්ගේ කාර්යභාරය අවසර දී ඇති සීමාවන් තුළ පවත්වාගත යුතු බව ඔහු අවධාරණය කළේය.
“ක්‍රීඩක කළමනාකරුවෙකු සිටීමේ ගැටලුවක් නැහැ. නමුත් ක්‍රිකට් කටයුතුවලට, තේරීම් කටයුතුවලට හෝ ඒ හා සම්බන්ධ වෙනත් කිසිම දෙයකට මැදිහත් වෙන්න එපා” යැයි ඔහු සඳහන් කළේය.
කළමනාකරුවන් එවැනි කටයුතුවලට මැදිහත් වුවහොත් අදාළ ක්‍රීඩකයන්ගේ හැසිරීම සම්බන්ධයෙන් ද විමර්ශනය කිරීමට සිදුවිය හැකි බව වෙත්තමුණි මහතා අනතුරු ඇඟවීය.
“එවැනි දෙයක් සිදුවුවහොත් අපි ක්‍රීඩකයන්ගේ හැසිරීම ගැනත් අවධානය යොමු කරනවා” යැයි ඔහු පැවසීය.
කෙසේ වෙතත්, මේ දක්වා කමිටුවට එවැනි ගැටලු හමුවී නොමැති බව ද වෙත්තමුණි මහතා වැඩිදුරටත් සඳහන් කළේය.
