රජයේ මුදල් අවභාවිත කළ බවට එල්ල වී ඇති චෝදනා සම්බන්ධ විමර්ශනයකට අදාළව අධිකරණය හමුවේ පෙනී නොසිටි හිටපු ඇමෙරිකා එක්සත් ජනපදයේ ශ්රී ලංකා තානාපති ජාලිය වික්රමසූරිය මහතා අත්අඩංගුවට ගෙන අධිකරණයට ඉදිරිපත් කරන ලෙස කොළඹ කොටුව මහේස්ත්රාත් අධිකරණය වරෙන්තුවක් නිකුත් කළේය.
මෙම නඩුවට අදාළ වන්නේ වික්රමසූරිය මහතා තානාපතිවරයා ලෙස කටයුතු කළ කාලයේදී තානාපති කාර්යාල ගොඩනැගිල්ලක් මිලදී ගැනීමේ සිද්ධියකි. එහිදී ඇමෙරිකානු ඩොලර් 332,000කට ආසන්න මුදලක් අවභාවිත කළ බවට ඔහුට චෝදනා එල්ල වී ඇත.
අපරාධ පරීක්ෂණ දෙපාර්තමේන්තුව (CID) අධිකරණයට දැනුම් දුන්නේ, සැකකරු මේ වන විට ඇමෙරිකා එක්සත් ජනපදයේ පදිංචිව සිටින බවත්, අධිකරණ ක්රියාමාර්ග මඟහරිමින් සිටින බවත්ය.
අපරාධ පරීක්ෂණ දෙපාර්තමේන්තුව ඉදිරිපත් කළ කරුණු සලකා බැලීමෙන් අනතුරුව මහේස්ත්රාත් පසන් අමරසේන මහතා විසින් මෙම අත්අඩංගුවට ගැනීමේ වරෙන්තුව නිකුත් කරන ලදී.
මීට පෙර නිකුත් කළ දැනුම්දීම් අනුව අද අධිකරණයට පැමිණ සිටි ඇපකරුවන්ට මහේස්ත්රාත්වරයා අවවාද කළේය.
විමර්ශන නිලධාරීන් අධිකරණයට දැනුම් දුන්නේ, මෙම සිද්ධිය සම්බන්ධයෙන් නීතිපතිවරයාගේ උපදෙස් ලබාගැනීම සඳහා යොමු කර ඇති බවයි.
නීතිපතිවරයාගේ උපදෙස් මත ඉදිරි කරුණු ඉදිරිපත් කිරීම සඳහා මෙම නඩුව දෙසැම්බර් 9 වැනිදා යළි කැඳවන ලෙස මහේස්ත්රාත්වරයා නියෝග කළේය.
