පේදුරුතුඩුව මූලික රෝහලේ හෙද නිලධාරීන් සඳහා ඉදිකෙරෙන සිව්මහල් නේවාසික සංකීර්ණයේ ඉදිකිරීම් ආරම්භ කිරීම සඳහා මුල්ගල තැබීම සෞඛ්ය අමාත්ය නලින්ද ජයතිස්ස මහතාගේ ප්රධානත්වයෙන් සිදුකර තිබේ.
රුපියල් මිලියන 212ක වියදමින් ඉදිකෙරෙන මෙම ව්යාපෘතිය උතුරු පළාතේ සෞඛ්ය යටිතල පහසුකම් ශක්තිමත් කිරීමේ වැඩසටහන යටතේ ක්රියාත්මක වන අතර, උතුරු පළාත් සභාව මගින් ඊට අවශ්ය මූල්ය ප්රතිපාදන සපයනු ලබයි.
හෙද නිලධාරීන් 50කට පමණ නේවාසික පහසුකම් සැලසෙන මෙම සංකීර්ණයේ ඉදිකිරීම් ලබන වසරේ ජූලි මාසය වනවිට අවසන් කිරීමට නියමිතය.
රෝහල ආසන්නයේ ප්රමාණවත් නේවාසික පහසුකම් නොමැතිවීම හේතුවෙන් හෙද නිලධාරීන් දිගුකාලයක් මුහුණ දී ඇති ගැටලු විසඳීම මෙම ව්යාපෘතියේ ප්රධාන අරමුණකි. ඒ අනුව ආරක්ෂිත සහ සුදුසු නේවාසික පහසුකම් සැලසීම මගින් හෙද කාර්ය මණ්ඩලයේ සේවා තත්ත්වය වැඩිදියුණු කිරීමට මෙන්ම හදිසි අවස්ථාවලදී කාර්යක්ෂමව සේවයට වාර්තා කිරීමටද හැකිවනු ඇත.
එමෙන්ම, රෝහල ආසන්නයේ අත්යවශ්ය සෞඛ්ය කාර්ය මණ්ඩලය රඳවා ගැනීමට හැකිවීම තුළින් රෝගී සත්කාර සේවා අඛණ්ඩව පවත්වාගෙන යාමටද මෙම ව්යාපෘතිය දායක වනු ඇතැයි නිලධාරීන් පෙන්වා දී තිබේ.
මෙහිදී අදහස් දැක්වූ අමාත්ය නලින්ද ජයතිස්ස මහතා සඳහන් කළේ උතුරු පළාතේ සෞඛ්ය සේවාවට නව පිබිදීමක් ඇති කිරීම අරමුණු කරගනිමින් දින හතරක් පුරා ක්රියාත්මක කළ ව්යාපෘති මාලාවේ අවසන් වැඩසටහන මෙය බවයි.
එම ව්යාපෘති මාලාව ජනාධිපති අනුර කුමාර දිසානායක මහතාගේ ප්රධානත්වයෙන් මන්නාරම දිස්ත්රික් මහ රෝහලේ රුපියල් මිලියන 600ක වියදමින් ඉදිකෙරෙන හදිසි ප්රතිකාර ඒකකයට මුල්ගල තැබීමෙන් ආරම්භ වූ බවද අමාත්යවරයා පැවසීය. එම ව්යාපෘතිය සඳහා ඉන්දීය රජයේ මූල්ය සහාය හිමිව තිබේ.
ත්රිකුණාමලයේ හෘද ප්රතිකාර ඒකකයක්, මුලතිව් රෝහලේ වෛද්ය වාට්ටු සංකීර්ණයක් මෙන්ම කිලිනොච්චිය, වවුනියාව, චාවකච්චේරි සහ තෙලිප්පලෙයි රෝහල්වල සෞඛ්ය කාර්ය මණ්ඩලය සඳහා නව නේවාසික පහසුකම් ඉදිකිරීමද මෙම ව්යාපෘති මාලයට ඇතුළත් වේ.
මෙම සියලු ව්යාපෘති සඳහා උතුරු පළාත පුරා සෞඛ්ය යටිතල පහසුකම් සංවර්ධනය වෙනුවෙන් රුපියල් මිලියන 1,000කට වැඩි මුදලක් ආයෝජනය කෙරේ.
උතුරු පළාතේ රෝහල්වල කාර්ය මණ්ඩලය ශක්තිමත් කිරීම සඳහා සෞඛ්ය සහායකයන් 350 දෙනෙකු බඳවා ගැනීමටද කටයුතු කරන බව අමාත්යවරයා මෙහිදී ප්රකාශ කළේය.
මීට අමතරව, තැපැල් සේවා පුළුල් කිරීම යටතේ කයිට්ස්, මුලතිව්, මන්නාරම සහ පුදුකුඩිඉරිප්පු යන ප්රදේශවල නව තැපැල් කාර්යාල ඉදිකිරීමටද රුපියල් මිලියන 110ක මුදලක් වෙන් කර ඇති බව සඳහන් කළේය.
මෙම සියලු ව්යාපෘති සඳහා වැය කරනු ලබන්නේ මහජන මුදල් බව අවධාරණය කළ අමාත්ය ජයතිස්ස මහතා, ශ්රී ලංකාවේ මිලියන 22ක් වන ජනතාවට වඩාත් සුවපහසු, ගෞරවාන්විත සහ ගුණාත්මක ජීවිතයක් සහතික කිරීම සඳහා රජය කැපවී සිටින බවද පැවසීය.
මුල්ගල තැබීමෙන් අනතුරුව අමාත්යවරයා පේදුරුතුඩුව රෝහලේ හදිසි සහ අනතුරු ප්රතිකාර ඒකකයද නිරීක්ෂණය කර ඇති අතර, එහි සේවා අවශ්යතා සම්බන්ධයෙන් සොයා බැලීමෙන් පසු කාර්ය මණ්ඩලය සමඟ සාකච්ඡාවකද නිරත වී තිබේ.
