විදේශ ණය වංචාවක් ලෙස සැලකෙන ඇමෙරිකානු ඩොලර් මිලියන 2.5කට (රුපියල් මිලියන 750කට වැඩි) අදාළ පොදු මුදල් පිළිබඳ කාරක සභාවේ (COPF) වාර්තාව විවේචනය කරමින් එක්සත් ජාතික පක්ෂය (එජාප) ප්රකාශ කර ඇත්තේ එම වාර්තාවෙන් මුදල් වංචාව සිදු වූ ආකාරය හෙළි කළද, වගකිව යුතු ජ්යෙෂ්ඨ නිලධාරීන්ට එරෙහිව නිසි පියවර ගැනීමක් සිදු කර නොමැති බවයි.
එජාපය ඉරිදා (26) නිකුත් කළ නිවේදනයක සඳහන් කළේ, මෙම සිදුවීම “පද්ධතිමය අසාර්ථකතා” සහ “ක්රියා පටිපාටිමය අඩුපාඩු” හේතුවෙන් සිදුවූ බවට වාර්තාවෙන් පෙන්වා දී ඇති නමුත්, මූල්ය අධීක්ෂණයට වගකිව යුතු ඉහළ නිලධාරීන් ආරක්ෂා කර ඇති බවයි.
චෝදනා කරන ලද නොසැලකිල්ල සම්බන්ධයෙන් මධ්යම මට්ටමේ නිලධාරීන් සිව්දෙනෙකුගේ සේවය අත්හිටුවා ඇති අතර, ජ්යෙෂ්ඨ නිලධාරීන් සම්බන්ධයෙන් පමණක් “සම්බන්ධීකරණ ගැටලු” ලෙස සඳහන් කර ඇති බව එජාපය පෙන්වා දී තිබේ.
එම පක්ෂය වැඩිදුරටත් චෝදනා කළේ, බරපතළ තොරතුරු තාක්ෂණ ආරක්ෂක දුර්වලතා හේතුවෙන් මෙම වංචාව සිදු කිරීමට අවස්ථාව සැලසී ඇති බවයි.
විදේශ සම්පත් දෙපාර්තමේන්තුව යල්පැනගිය විද්යුත් තැපැල් පද්ධතියක් භාවිත කළ බවත්, බහු-පියවර සත්යාපනය (Multi-Factor Authentication) නොමැති වීම ඇතුළු ප්රමාණවත් සයිබර් ආරක්ෂක ක්රියාමාර්ග නොමැති බවට ස්වාධීන විගණන මගින් ලබා දුන් අනතුරු ඇඟවීම් ක්රියාත්මක කර නොමැති බවත් එජාපය සඳහන් කළේය.
ශ්රී ලංකා මහ බැංකුවේ සිට රාජ්ය ණය කළමනාකරණ කාර්යාලය (PDMO) වෙත රාජ්ය ණය කළමනාකරණ වගකීම් මාරු කිරීමේ ක්රියාවලිය නිසි ලෙස කළමනාකරණය නොකළ බවටද එජාපය රජයට චෝදනා කළේය.
එම මාරුවීමේ කාලසීමාවේදී ප්රමාණවත් ආරක්ෂක පියවර සහ පාලන ක්රමවේද ස්ථාපිත කර නොතිබූ බව පක්ෂය පෙන්වා දී තිබේ.
2025 නොවැම්බර් සිට 2026 ජනවාරි දක්වා කාලය තුළ සිදුවූ මෙම වංචාව පිළිබඳව ජනතාව දැනුවත් කිරීම රජය ප්රමාද කළ බවත්, පරීක්ෂණ කටයුතු හේතුවක් ලෙස දක්වමින් තොරතුරු වසන් කළ බවත් එජාපය චෝදනා කළේය.
ඩොලර් මිලියන 2.5ක පාඩුව තාක්ෂණික දෝෂයක් පමණක් නොව, පාලන ක්රමවේද අසාර්ථක වීමේ ප්රතිඵලයක් බව සඳහන් කළ එජාපය, රාජ්ය ණය කළමනාකරණ වගකීම් මාරුව නිසි ලෙස අධීක්ෂණය කිරීමට සහ මහජන මුදල් ආරක්ෂා කිරීමට මුදල් අමාත්යවරයා සහ මුදල් අමාත්යාංශ ලේකම්වරයා අපොහොසත් වූ බවට චෝදනා කළේය.
