ඇමෙරිකානු ජනාධිපති ඩොනල්ඩ් ට්රම්ප් පසුගිය ජූලි මාසයේ තුර්කියේ සිට ඇමෙරිකාව බලා යළි පැමිණීමේදී ආරක්ෂක තර්ජනයක් හේතුවෙන් රහසිගතව ගුවන් යානයක් මාරු කළ බව අඟහරුවාදා රාත්රියේ තහවුරු කර තිබේ.
ට්රම්ප් මාධ්යවේදීන් අමතමින් සඳහන් කර ඇත්තේ මෙම තීරණය ගෙන ඇත්තේ ජනාධිපති ආරක්ෂක සේවය (Secret Service) සහ ඇමෙරිකානු හමුදාව විසින් බවයි.
“ඔවුන්ට අවශ්ය වූයේ මම වෙනත් ගුවන් යානයකින් යාමයි. මම හිතන්නේ එහි යම් තර්ජනයක් තිබුණා,” යැයි ට්රම්ප් පවසා තිබේ.
The Washington Post පුවත්පතේ වාර්තාවක් මත පදනම්ව NBC News මීට පෙර තහවුරු කර තිබුණේ ජූලි 8 වැනිදා ට්රම්ප් කැමරා ඉදිරිපිට එයාර් ෆෝස් වන් ගුවන් යානයට ගොඩවීමෙන් අනතුරුව, ආහාර සැපයීමේ රථයක් භාවිත කරමින් රහසිගතව සලකුණු නොකළ වෙනත් ගුවන් යානයකට මාරු කර ඇති බවයි.
ඒ අනුව ඔහු අන්කාරා සිට එක්සත් රාජධානියේ හමුදා කඳවුරක් දක්වා එම ගුවන් යානයෙන් ගමන් කර ඇති අතර, මාධ්යවේදීන් සහ ධවල මන්දිර කාර්ය මණ්ඩලයේ ඇතැමුන් ඔහු තවමත් එයාර් ෆෝස් වන් යානයේ සිටින බව විශ්වාස කර තිබේ.
ට්රම්ප් සඳහන් කර ඇත්තේ තමන් ගමන් කළ ගුවන් යානය වෙනුවට මුලින් තමන් ගමන් කිරීමට නියමිතව තිබූ ගුවන් යානයට වැඩි අවදානමක් තිබූ බවයි. එය වඩාත් පහසුවෙන් ඉලක්ක කළ හැකි ගුවන් යානයක් විය හැකි බවද ඔහු පවසා තිබේ.
කෙසේ වෙතත්, ඔහු ගමන් කළ C-32 වර්ගයේ, එයාර් ෆෝස් වන් ලෙස හඳුනාගත නොහැකි සලකුණු නොමැති ගුවන් යානය වෙනත් යානයකට වඩා වැඩි අවදානමකට ලක්වන්නේ මන්දැයි ට්රම්ප් පැහැදිලි කර නොමැත.
NBC News වාර්තා කර ඇති පරිදි, මෙම ගුවන් යානා මාරුව සිදුවී ඇත්තේ ට්රම්ප් ඝාතනය කිරීම සඳහා ඉරානයෙන් නව සැලසුමක් ක්රියාත්මක විය හැකි බවට ලැබුණු තොරතුරු මධ්යයේය. එම සැලසුමට තුර්කියෙන් පිටත්වන අවස්ථාවේ එයාර් ෆෝස් වන් යානයට උරහිස මත රඳවා ක්රියාත්මක කළ හැකි මිසයිලයකින් ප්රහාරයක් එල්ල කිරීමේ හැකියාවක්ද ඇතුළත් වූ බව ඇමෙරිකානු නිලධාරියෙකු උපුටා දක්වමින් එම මාධ්ය වාර්තා කර තිබේ.
කෙසේ වෙතත්, ට්රම්ප් සමඟ නොගිය ව්යාජ ගමන් යානයේ මාධ්යවේදීන් සහ ධවල මන්දිරයේ ජ්යෙෂ්ඨ නිලධාරීන් කිහිපදෙනෙකු රැඳී සිට ඇති අතර, ඒ අතර ජනාධිපති ධුර අනුප්රාප්තික ලැයිස්තුවේ සිටින රාජ්ය ලේකම් මාර්කෝ රූබියෝ සහ භාණ්ඩාගාර ලේකම් ස්කොට් බෙසන්ට්ද සිට ඇත.
තර්ජනය සම්බන්ධයෙන් වැඩි විස්තර තමන් විමසා නොසිටි බව ට්රම්ප් පවසා ඇති අතර, ජනාධිපතිවරයෙකුට එවැනි තර්ජන එල්ල වීම තමන් පුදුමයට පත් නොකරන බවද සඳහන් කර තිබේ.
මේ අතර, ඇමෙරිකානු කොංග්රසයේ ඩිමොක්රටික් පක්ෂයේ මන්ත්රීවරු ට්රම්ප්ගේ පසුගිය මාසයේ ගුවන් ගමන සහ එම අවස්ථාවේ පැවති ආරක්ෂක තර්ජන පිළිබඳ නිලධාරීන්ගෙන් සවිස්තරාත්මක දැනුවත් කිරීමක් ඉල්ලා තිබේ.
