හිටපු ජනාධිපති ගෝඨාභය රාජපක්ෂ මහතා 2011 වසරේ යාපනයේදී අතුරුදන් වූ දේශපාලන ක්රියාකාරීන් වන ලලිත් කුමාර් වීරරාජ් සහ කුගන් මුරුගානන්දන් සම්බන්ධ නඩු විභාගයේදී සාක්ෂි ලබාදීම සඳහා ඊයේ (29) කොළඹ ප්රධාන මහේස්ත්රාත් අධිකරණය හමුවේ පෙනී සිටියේය.
ලලිත් වීරරාජ් සහ කුගන් මුරුගානන්දන් යන දෙදෙනා 2011 වසරේදී යාපනයේදී අතුරුදන්වීම සම්බන්ධයෙන් විභාග වන නඩුවේදී ගෝඨාභය රාජපක්ෂ මහතා වීඩියෝ තාක්ෂණය ඔස්සේ සාක්ෂි ලබාදීම සඳහා කොළඹ ප්රධාන මහේස්ත්රාත් අධිකරණයට පැමිණෙන ලෙස යාපනය මහේස්ත්රාත් අධිකරණය අගෝස්තු මාසයේදී නියෝග කර තිබිණි.
අදාළ අතුරුදන්වීම් සිදුවන අවස්ථාවේදී ගෝඨාභය රාජපක්ෂ මහතා ආරක්ෂක ලේකම්වරයා ලෙස කටයුතු කරමින් සිටි අතර, සාක්ෂි ලබාදීම සඳහා 2019 සැප්තැම්බර් 27 වැනිදා පළමුවරට යාපනය මහේස්ත්රාත් අධිකරණය විසින් ඔහු කැඳවා තිබිණි.
මෙම වසරේ මුල් භාගයේදී, ආරක්ෂක හේතූන් මත විද්යුත් ශ්රව්ය දෘශ්ය මාධ්ය ඔස්සේ සාක්ෂි ලබාදීමට අවසර ලබාදෙන ලෙස රාජපක්ෂ මහතා කළ ඉල්ලීමකට අනුව, දුරස්ථව සාක්ෂි ලබාදීමට අධිකරණය අවසර ලබාදී තිබේ.
අධිකරණ වාර්තාවලට අනුව, පසුගිය වසරේ දෙසැම්බර් මාසයේදී රාජපක්ෂ මහතා අධිකරණය හමුවේ පෙනී නොසිටි අතර, ඔහුගේ නීතිඥවරුන් ඒ සඳහා ඔහුගේ ජීවිතයට එල්ල වී ඇති තර්ජන හේතුවක් ලෙස ඉදිරිපත් කර තිබිණි.
මෙම නඩුවේ කටයුතු යාපනය මහේස්ත්රාත් අධිකරණය හමුවේ සිදුවන අතර, ගෝඨාභය රාජපක්ෂ මහතා කොළඹ ප්රධාන මහේස්ත්රාත් අධිකරණයේ සිට වීඩියෝ සම්බන්ධතාවක් ඔස්සේ සාක්ෂි ලබාදී තිබේ.
