ශ්රී ලංකාවේ රූපවාහිනී විකාශන ක්ෂේත්රය ඩිජිටල්කරණය කිරීමේ ව්යාපෘතිය සම්බන්ධයෙන් මාධ්ය ක්ෂේත්රයේ පාර්ශ්වකරුවන් දැනුවත් කිරීමේ විශේෂ වැඩසටහනක් පැවැත්වුණු අතර, එහි ප්රතිඵලයක් ලෙස මෙරට ප්රේක්ෂකයන්ට පළමු ඩිජිටල් රූපවාහිනී අත්දැකීම 2028 දෙසැම්බර් මාසය වන විට ලබාදීමට අපේක්ෂා කෙරේ.
ජනමාධ්ය අමාත්ය නලින්ද ජයතිස්ස මහතාගේ ප්රධානත්වයෙන් මෙම වැඩසටහන සඳුදා (28) කොළඹදී පැවැත්විණි. මාධ්ය ආයතනවල හිමිකරුවන් සහ ප්රධානීන් ඇතුළු ක්ෂේත්රයේ පාර්ශ්වකරුවන් රැසක් ඊට සහභාගී වූහ.
භූමිෂ්ඨ රූපවාහිනී විකාශන ඩිජිටල්කරණ ව්යාපෘතියේ (DTTB) මේ වන විට ලබා ඇති ප්රගතිය, ඉදිරි පියවර මෙන්ම මෙරට රූපවාහිනී විකාශන ක්ෂේත්රයට හඳුන්වාදීමට නියමිත තාක්ෂණික සහ මෙහෙයුම් වෙනස්කම් පිළිබඳව වැඩසටහනේදී අවධානය යොමු කෙරිණි.
දශක හතරකට වැඩි කාලයක් මෙරට භාවිත වන ඇනලොග් රූපවාහිනී විකාශන පද්ධතිය වෙනුවට සියලුම රූපවාහිනී විකාශකයන් සඳහා පොදු ඩිජිටල් විකාශන වේදිකාවක් හඳුන්වාදීම මෙම ව්යාපෘතියේ අරමුණයි.
මේ වන විට ව්යාපෘතිය සැලසුම් කිරීම සහ සංවර්ධනය කිරීමේ අදියරේ පවතින අතර, 2028 දෙසැම්බර් මාසයේදී මෙරට ප්රේක්ෂකයන්ට පළමු ඩිජිටල් රූපවාහිනී අත්දැකීම ලබාදීමට සැලසුම් කර තිබේ.
ජපාන රජයේ සහ ජපාන ජාත්යන්තර සහයෝගිතා ආයතනයේ (JICA) සහාය ඇතිව ක්රියාත්මක වන මෙම ව්යාපෘතිය මගින් ISDB-T ඩිජිටල් රූපවාහිනී විකාශන ප්රමිතිය ශ්රී ලංකාවට හඳුන්වා දීමට නියමිතය.
මෙම පරිවර්තනයත් සමඟ අධි විභේදන (HD) රූපවාහිනී සේවා, වැඩිදියුණු කළ රූප සහ ශබ්ද ගුණාත්මකභාවය, පුළුල් සංඥා ආවරණයක් සහ ගුවන්විදුලි සංඛ්යාත වර්ණාවලිය වඩාත් කාර්යක්ෂමව භාවිත කිරීමේ හැකියාව ලැබෙනු ඇතැයි අපේක්ෂා කෙරේ.
නව පද්ධතිය යටතේ රාජ්ය සහ පෞද්ගලික රූපවාහිනී විකාශකයන් පොදු ඩිජිටල් විකාශන වේදිකාවක් හරහා ක්රියාත්මක වනු ඇත. ඒ අනුව එක් එක් විකාශකයාට වෙන වෙනම විකාශන යටිතල පහසුකම් පවත්වාගෙන යාමේ අවශ්යතාව අඩු වනු ඇත. එමෙන්ම නව ඩිජිටල් සේවා සහ අමතර වටිනාකම් සහිත සේවා හඳුන්වාදීම සඳහාද නව අවස්ථා නිර්මාණය වනු ඇතැයි අපේක්ෂා කෙරේ.
වැඩසටහන අමතමින් අමාත්ය නලින්ද ජයතිස්ස මහතා පැවසුවේ මෙම වැඩසටහන රූපවාහිනී විකාශන තාක්ෂණයේ වෙනසක් ලෙස පමණක් නොසැලකිය යුතු බවයි. එය විකාශන යටිතල පහසුකම් නවීකරණය කිරීම සහ ශ්රී ලංකාවේ පුළුල් ඩිජිටල් පරිවර්තනයට සහාය වීම අරමුණු කරගත් වැදගත් ජාතික වැඩසටහනක් බවද ඔහු පෙන්වා දුන්නේය.
පොදු ඩිජිටල් විකාශන වේදිකාව කිසිදු රාජ්ය හෝ පෞද්ගලික විකාශකයකුට වෙනස්කම් නොකර, විනිවිදභාවයෙන්, සාධාරණව සහ වගකීමෙන් යුතුව මෙහෙයවීමේ වැදගත්කමද අමාත්යවරයා අවධාරණය කළේය.
ඩිජිටල් ආර්ථික නියෝජ්ය අමාත්ය එරංග වීරරත්න මහතා, ශ්රී ලංකාවේ ජපාන තානාපති අකියෝ ඉසොමාටා මහතා, JICA ආයතනයේ ජ්යෙෂ්ඨ නියෝජිතයන් සහ රජයේ නිලධාරීන් ඇතුළු පිරිසක් මෙම වැඩසටහනට සහභාගී වූහ.
