සෞදි අරාබියේ ශ්රී ලංකා තානාපති අමීර් අජ්වාඩ් මහතා විසින් රියාද් ශ්රී විජය බෞද්ධ දහම් පාසල වසා දැමීමට නියෝග කළ බවට හෝ බෞද්ධ ආගමික කටයුතු වලට බාධා කළ බවට පළ වූ වාර්තා අසත්ය හා නොමඟ යවන සුළු බව එම දහම් පාසලේ විදුහල්පතිවරයා ප්රකාශ කර තිබේ.
දහම් පාසලේ ආරම්භක සාමාජිකයෙකු සහ විදුහල්පතිවරයා වන අතුල කුමාරසිංහ මහතා නිවේදනයක් නිකුත් කරමින් සඳහන් කළේ, 2007 වසරේ සිට රියාද්හි ශ්රී ලංකා තානාපති කාර්යාල පරිශ්රයේ පවත්වාගෙන ගිය මෙම දහම් පාසල වසා දමා නොමැති බවයි.
තානාපති කාර්යාලය නව ගොඩනැගිල්ලකට ගෙන යාමෙන් පසු එහි ඉඩකඩ සීමා වීම හේතුවෙන් මාස කිහිපයක් පන්ති තාවකාලිකව නතර කළ බවත්, එය දහම් පාසල වසා දැමීමේ තීරණයක් නොව, පවතින පහසුකම් සම්බන්ධ ගැටලුවක් පමණක් බවත් ඔහු පැවසීය.
කුමාරසිංහ මහතා සඳහන් කළේ, රියාද් ශ්රී ලංකා ජාත්යන්තර පාසලේ 2026/2027 අධ්යයන වර්ෂය ආරම්භ වන සැප්තැම්බර් 2026 සිට දහම් පාසල් කටයුතු නැවත ආරම්භ කිරීම සඳහා තානාපති අමීර් අජ්වාඩ් මහතා නව තානාපති කාර්යාල ගොඩනැගිල්ලේ ඉඩ පහසුකම් වෙන් කිරීමට මාස කිහිපයකට පෙර අනුමැතිය ලබා දී ඇති බවයි.
එමෙන්ම, තානාපතිවරයා වෙසක් උත්සව හෝ බෞද්ධ ආගමික වැඩසටහන් පැවැත්වීමට බාධා කළ බවට ඇති චෝදනාද ඔහු ප්රතික්ෂේප කළේය.
2026 වෙසක් භක්ති ගීත වැඩසටහන සඳහා පුහුණුවීම් මාසයක පමණ කාලයක් තානාපති කාර්යාල පරිශ්රයේදී තානාපතිවරයාගේ පූර්ණ අනුමැතිය හා සහයෝගය යටතේ පැවැත්වූ බවත්, ඒ සඳහා දරුවන් සිය ගණනක් සහ ඔවුන්ගේ දෙමාපියන් සහභාගී වූ බවත් ඔහු සඳහන් කළේය.
ප්රධාන වෙසක් උත්සවය වෙනත් විශාල ස්ථානයක පැවැත්වීමට සිදුවූයේ අපේක්ෂිත දහස් ගණනක සහභාගිවන්නන් සඳහා තානාපති කාර්යාල පරිශ්රයේ ප්රමාණවත් ඉඩක් නොතිබීම හේතුවෙන් බවද ඔහු පැවසීය.
එම විකල්ප ස්ථානය ලබා ගැනීම සඳහා තානාපති අමීර් අජ්වාඩ් මහතාගේ සෘජු මැදිහත්වීම සහ සෞදි බලධාරීන්ගේ අවශ්ය අනුමැතිය ලබාගැනීම සිදු වූ බවද කුමාරසිංහ මහතා සඳහන් කළේය.
තානාපතිවරයා දහම් පාසල වසා දැමූ බවට හෝ බෞද්ධ ආගමික කටයුතු වලට බාධා කළ බවට පළ වූ වාර්තා නිවැරදි නොවන හා නොමඟ යවන සුළු බව පවසමින්, ඒ සම්බන්ධයෙන් නිවැරදි කිරීමක් පළ කරන ලෙස ඔහු මාධ්ය ආයතනවලින් ඉල්ලා සිටියේය.
