යෝජිත 22 වැනි ආණ්ඩුක්රම ව්යවස්ථා සංශෝධනය ඉවත් කරගන්නා ලෙස රජයට බල කරමින් සමගි ජන බලවේගය (SJB) ඊයේ (24) බත්තරමුල්ල පාර්ලිමේන්තු සංකීර්ණය ආසන්නයේදී විරෝධතාවක් පවත්වා තිබේ.
පොල්දූව මංසන්ධිය ආසන්නයේ පැවති මෙම විරෝධතාවට වැසි සහිත කාලගුණයක් පැවතියද විශාල පිරිසක් එක්ව සිටි අතර, විපක්ෂ නායක සජිත් ප්රේමදාස මහතාද SJB මන්ත්රීවරුන් සහ ආධාරකරුවන් සමඟ ඊට එක්විය.
යෝජිත ආණ්ඩුක්රම ව්යවස්ථා සංශෝධනය ඉවත් කරගන්නා ලෙස විරෝධතාකරුවන් ඉල්ලා සිටි අතර, එය අධිකරණයේ ස්වාධීනත්වයට සහ නීතියේ ආධිපත්යයට ඇති කළ හැකි බලපෑම් සම්බන්ධයෙන් SJB විසින් මතු කර ඇති කරුණුද විරෝධතාවයේදී අවධාරණය කර තිබේ.
22 වැනි ආණ්ඩුක්රම ව්යවස්ථා සංශෝධනය සම්බන්ධයෙන් පාර්ලිමේන්තුවේ දෙවැනිවර කියවීමේ විවාදය ඊයේ ආරම්භ වූ අතර, එම විවාදය අද (25) දිනයේද පැවැත්වීමට නියමිතය. පාර්ලිමේන්තුවේ නිල වැඩසටහන අනුව සංශෝධනය පිළිබඳ විවාදය සැප්තැම්බර් 24 සහ 25 යන දිනවල පැවැත්වීමට නියම කර තිබේ.
මේ අතර, ශ්රේෂ්ඨාධිකරණය තීරණය කර ඇත්තේ යෝජිත 22 වැනි ආණ්ඩුක්රම ව්යවස්ථා සංශෝධනය සඳහා ආණ්ඩුක්රම ව්යවස්ථාවේ 83 වැනි වගන්තිය යටතේ ජනමත විචාරණයක අනුමැතිය අවශ්ය නොවන බවයි. එය පාර්ලිමේන්තුවේ විශේෂ බහුතරයකින් සම්මත කළ හැකි බවද ශ්රේෂ්ඨාධිකරණ තීරණය පාර්ලිමේන්තුවට දැනුම් දෙමින් කථානායකවරයා ප්රකාශ කර තිබේ.
