කටාර් රාජ්යය සමඟ ශ්රී ලංකාවේ ආර්ථික හා සංවර්ධන සබඳතා තවදුරටත් ශක්තිමත් කිරීම සම්බන්ධයෙන් අවධානය යොමු කරමින්, නව ආයෝජන, සංවර්ධන සහාය සහ පුහුණු ශ්රී ලාංකිකයන් සඳහා වැඩි රැකියා අවස්ථා සම්බන්ධයෙන් සාකච්ඡා පවත්වා තිබේ.
විදේශ කටයුතු සහ විදේශ රැකියා නියෝජ්ය අමාත්ය අරුණ් හේමචන්ද්ර මහතාගේ දෝහා නිල සංචාරය අතරතුර මෙම සාකච්ඡා සිදුකර ඇති අතර, ඔහු කටාර් වාණිජ මණ්ඩලය සහ කටාර් සංවර්ධන අරමුදල (QFFD) සමඟ වෙන වෙනම සාකච්ඡා පවත්වා තිබේ. එමෙන්ම දෝහාහි වෙසෙන ශ්රී ලාංකික ප්රජාවේ සාමාජිකයන් හමුවී විදේශ ශ්රමිකයන්ට බලපාන ගැටලු සහ ශ්රී ලංකාවේ වත්මන් තත්ත්වය පිළිබඳවද සාකච්ඡා කර ඇත.
කටාර් වාණිජ මණ්ඩලයේදී නියෝජ්ය අමාත්යවරයා එහි පළමු උප සභාපති මොහොමඩ් බින් අහමඩ් බින් ත්වාර් මහතා හමුවී ඇති අතර, දෙරට අතර වෙළෙඳාම, ආයෝජන සහ ව්යාපාරිකයන් අතර සහයෝගීතාව පුළුල් කිරීමේ අවස්ථා පිළිබඳව සාකච්ඡා කර තිබේ.
කොළඹ වරාය නගරය, දේපළ වෙළෙඳාම් සහ අනෙකුත් නැගී එන ක්ෂේත්රවල පවතින ආයෝජන අවස්ථා පිළිබඳව හේමචන්ද්ර මහතා අවධානය යොමු කර ඇති අතර, ධාරිතා සංවර්ධනය සහ ශ්රී ලාංකික හා කටාර් ව්යාපාරික ප්රජාවන් අතර ශක්තිමත් සබඳතා ගොඩනැගීමේ ක්රම පිළිබඳවද සාකච්ඡා කර ඇත.
ශ්රී ලංකාවේ ආර්ථික ස්ථාවරත්වය, රාජ්ය මූල්ය විනය සහ ආයතනික ශක්තිමත් කිරීම අරමුණු කර ගනිමින් ජනාධිපති අනුර කුමාර දිසානායක මහතාගේ රජය ක්රියාත්මක කරන ආර්ථික හා ආයතනික ප්රතිසංස්කරණ පිළිබඳවද නියෝජ්ය අමාත්යවරයා කටාර් වාණිජ මණ්ඩලය දැනුවත් කර තිබේ.
එම ප්රතිසංස්කරණ මගින් වඩාත් ස්ථාවර, පුරෝකථනය කළ හැකි සහ ආයෝජකයන්ට හිතකර පරිසරයක් නිර්මාණය කිරීමත්, ආයෝජන සඳහා වැඩි ආරක්ෂාවක් ලබාදීමත්, තිරසර ආර්ථික වර්ධනයට සහාය වීමත් අපේක්ෂා කරන බව ඔහු සඳහන් කර ඇත.
ශ්රී ලංකාවේ ස්වෛරී ණය ශ්රේණිය ‘B-’ දක්වා ඉහළ නැංවීමට Fitch Ratings ආයතනය මෑතකදී ගත් තීරණය සහ එයට ස්ථාවර ඉදිරි දැක්මක් ලබාදීම පිළිබඳවද හේමචන්ද්ර මහතා සඳහන් කර තිබේ. එය සාර්ව ආර්ථික ස්ථාවරකරණය, ව්යුහාත්මක ප්රතිසංස්කරණ සහ රටේ රාජ්ය මූල්ය හා බාහිර ගිණුම්වල සිදුව ඇති වැඩිදියුණු කිරීම් පිළිබිඹු කරන බව ඔහු පෙන්වා දී ඇත.
එමෙන්ම ශ්රී ලංකා එක්ස්පෝ 2027 පිළිබඳවද කටාර් වාණිජ මණ්ඩලය දැනුවත් කර ඇති අතර, කටාර් ව්යාපාරිකයන්, ශ්රී ලාංකික ව්යවසායකයන් සහ ව්යාපාරික සංවිධාන අතර සබඳතා ශක්තිමත් කිරීම පිළිබඳව අදහස් හුවමාරු කරගෙන තිබේ. ශ්රී ලංකා එක්ස්පෝ 2027 සඳහා කටාර් වාණිජ මණ්ඩලය සහ කටාර් ව්යාපාරිකයන් සහභාගී කරවා ගැනීමටද ආරාධනා කර ඇති බව කටාර් පුවත් ඒජන්සිය වාර්තා කරයි.
පෞද්ගලික අංශ අතර සහයෝගීතාව පුළුල් කරමින් ශ්රී ලංකාවේ වෙනස් වෙමින් පවතින ආර්ථික පරිසරය හරහා කටාර් රාජ්යය සමඟ වැඩි වෙළෙඳ, ආයෝජන සහ දිගුකාලීන ව්යාපාරික හවුල්කාරීත්වයන් ඇති කර ගැනීමේ ක්රම පිළිබඳවද සාකච්ඡා කර තිබේ.
කටාර්හි ශ්රී ලංකා තානාපතිනී සිතාරා ඛාන් මහත්මියද මෙම හමුවට එක්ව සිටියාය.
කටාර් සංවර්ධන අරමුදල සමඟත් සාකච්ඡා
මේ අතර, සංවර්ධන සහයෝගීතාව තවදුරටත් පුළුල් කිරීමේ අරමුණින් නියෝජ්ය අමාත්ය හේමචන්ද්ර මහතා කටාර් සංවර්ධන අරමුදලේ නියෝජ්ය අධ්යක්ෂ ජනරාල් අබ්දුල්ලා අල්ෆෙහානි මහතාද හමුවී තිබේ.
අභියෝගාත්මක කාලවලදී කටාර් සංවර්ධන අරමුදල ශ්රී ලංකාවට ලබාදුන් මානුෂීය සහාය සහ අඛණ්ඩ සංවර්ධන සහාය සම්බන්ධයෙන් ශ්රී ලංකාවේ ස්තූතිය ඔහු එහිදී පළ කර ඇත.
සෞඛ්ය, අධ්යාපන සහ නිවාස යන ක්ෂේත්රවලට කටාර් සංවර්ධන අරමුදල ලබාදී ඇති සහාය පිළිබඳවද ඔහු අවධානය යොමු කර තිබේ.
එහි වත්මන් ප්රමුඛතා පිළිබඳව දෙපාර්ශ්වය සමාලෝචනය කර ඇති අතර, ශ්රී ලංකාවේ ඉදිරි සංවර්ධන සහයෝගීතාව සහ නව ව්යාපෘති සඳහා ඇති හැකියාව පිළිබඳවද සාකච්ඡා කර ඇත.
දෙරට අතර දිගුකාලීන සංවර්ධන හවුල්කාරීත්වය තවදුරටත් ඉදිරියට ගෙන යමින් කටාර් සංවර්ධන අරමුදල සමඟ ශ්රී ලංකාවේ සබඳතා ශක්තිමත් කිරීමට අපේක්ෂා කරන බව හේමචන්ද්ර මහතා සඳහන් කර ඇත.
කටාර්හි ශ්රී ලාංකිකයන්ගේ ගැටලු ගැනත් අවධානය
නියෝජ්ය අමාත්යවරයා දෝහාහි Dusit D2 හෝටලයේදී Ethera Api සංවිධානය කළ හමුවකට සහභාගී වෙමින් කටාර්හි වෙසෙන ශ්රී ලාංකික ප්රජාවේ සාමාජිකයන් සමඟද සාකච්ඡා කර තිබේ.
කටාර්හි ජීවත් වන සහ රැකියාවල නිරත ශ්රී ලාංකිකයන්ගේ අත්දැකීම් හා ගැටලු සෘජුවම අසා දැන ගැනීමටත්, ශ්රී ලංකාව ගමන් කරමින් සිටින දිශාව පිළිබඳව සාකච්ඡා කිරීමටත් එම හමුව අවස්ථාවක් වූ බව හේමචන්ද්ර මහතා පවසා ඇත.
විදේශ ශ්රමිකයන්ගේ සුබසාධනය සහ ආරක්ෂාව, සාධාරණ හා විනිවිදභාවයෙන් යුත් බඳවා ගැනීමේ ක්රමවේද සහ විදේශ රැකියාවල නිරත ශ්රී ලාංකිකයන්ට ලබාදෙන සේවාවන් වැඩිදියුණු කිරීම ඇතුළු කරුණු රැසක් එහිදී සාකච්ඡා කර තිබේ.
කටාර් වැනි රටවල පුහුණු හා නිපුණතා සහිත ශ්රී ලාංකිකයන් සඳහා වැඩි රැකියා අවස්ථා නිර්මාණය කිරීමේ අවශ්යතාව පිළිබඳවද නියෝජ්ය අමාත්යවරයා අවධානය යොමු කර ඇත. කටාර් සහ ශ්රී ලංකාව අතර කම්කරු ක්ෂේත්රයේ සහයෝගීතාව සහ සුදුසුකම් ලත් ශ්රමිකයන් සඳහා අවස්ථා වැඩි කිරීම පිළිබඳව දෙරටේ නිලධාරීන් මීට පෙරද සාකච්ඡා කර තිබේ.
ජනාධිපති අනුර කුමාර දිසානායක මහතා 2024 සැප්තැම්බර් මාසයේදී ධුරයට පත්වීමෙන් පසු රජය ලබා ඇති ප්රගතිය පිළිබඳවද හේමචන්ද්ර මහතා එම හමුවේදී කරුණු පැහැදිලි කර තිබේ. පසුගිය වසර දෙක තුළ සිදුකර ඇති වෙනස්කම් සහ ඉදිරියේදී රජය විසින් ඉටු කළ යුතු වගකීම් පිළිබඳවද ඔහු පැහැදිලි කර ඇත.
විදේශගතව සිටියද ශ්රී ලාංකිකයන් රට සමඟ පවත්වාගෙන යන සබඳතාව සහ රටේ අනාගතය පිළිබඳව දක්වන උනන්දුව අගය කළ නියෝජ්ය අමාත්යවරයා, රටේ ආර්ථිකයට ඔවුන් ලබාදෙන දායකත්වයද අවධාරණය කර තිබේ.
හේමචන්ද්ර මහතාගේ දෝහා නිල සංචාරයේ කොටසක් ලෙස පැවති මෙම සාකච්ඡා හරහා ආයෝජන, වෙළෙඳාම, සංවර්ධන සහයෝගීතාව සහ විදේශ රැකියා යන ක්ෂේත්ර ඔස්සේ ශ්රී ලංකාව සහ කටාර් රාජ්යය අතර සබඳතා තවදුරටත් ශක්තිමත් කිරීම රජයේ අරමුණ වී තිබේ.
