2026 FIFA ලෝක කුසලාන අවසන් තරගයේදී ස්පාඤ්ඤය හමුවේ ලැබූ පරාජයෙන් අනතුරුව ඇති වූ ගැටුම සම්බන්ධයෙන් ආර්ජන්ටිනා ක්රීඩකයන් කිහිපදෙනෙකුට දීර්ඝ තරග තහනම් සහ දඩ මුදල් පැනවීමට FIFA පියවර ගෙන තිබේ.
එහිදී දැඩිම දඬුවම හිමිව ඇත්තේ ආර්ජන්ටිනා මැදපෙළ ක්රීඩක Leandro Paredes වෙත වන අතර, ඔහුට ජාත්යන්තර තරග 10ක තහනමක් සහ ඇමරිකානු ඩොලර් 90,000ක දඩයක් පනවා ඇත.
ආරක්ෂක ක්රීඩක Nahuel Molina තරග 7කට තහනම් කර ඇත්තේ ඩොලර් 90,000ක දඩයක්ද සමඟිනි. Thiago Almadaට එක් තරගයක තහනමක් සහ ඩොලර් 30,000ක දඩයක් පනවා තිබේ.
ආර්ජන්ටිනා සහය පුහුණුකරු Roberto Ayalaට තරග 3ක තහනමක් සහ ඩොලර් 30,000ක දඩයක් හිමිව ඇත.
මේ අතර, ගැටුමට සම්බන්ධ වූ ස්පාඤ්ඤ මැදපෙළ ක්රීඩක Gaviටද එක් තරගයක තහනමක් සහ ඩොලර් 30,000ක දඩයක් පනවා තිබේ.
මෙම ගැටුම ජූලි 19 වැනිදා නිව්යෝර්ක්-නිව් ජර්සි ක්රීඩාංගණයේ පැවති ලෝක කුසලාන අවසන් තරගයේදී ස්පාඤ්ඤය ගෝල 1-0කින් ආර්ජන්ටිනාව පරාජය කිරීමෙන් අනතුරුව ඇති විය.
මෙම සිද්ධීන් සම්බන්ධයෙන් FIFA හි විනය හා ආචාරධර්ම පිළිබඳ නඩු පැවරීමේ නිලධාරියා ඉදිරිපත් කළ වාර්තාවක් මත FIFA විනය පරීක්ෂණ ආරම්භ කර තිබිණි.
ආර්ජන්ටිනා පාපන්දු සංගමයට (AFA)ද තරගාවලිය අතරතුර සිදු වූ විවිධ විනය උල්ලංඝනයන් සම්බන්ධයෙන් ඇමරිකානු ඩොලර් 321,000ක දඩයක් පනවා තිබේ. කණ්ඩායමේ විනය විරෝධී හැසිරීම්, වෙනස්කම්කාරී හැසිරීම් සහ දේශපාලන බැනරයක් ප්රදර්ශනය කිරීම ඇතුළු කරුණු ඒ අතරට ඇතුළත් වේ.
එමෙන්ම ආර්ජන්ටිනාව මීළඟ ගෘහස්ථ තරග දෙක ක්රීඩා කළ යුත්තේ ක්රීඩාංගණයේ ධාරිතාවෙන් 50%ක් පමණක් භාවිත කරමිනි. එම දඬුවමේ කොටසක් පරිවාස කාලයකට යටත්ව අත්හිටුවා තිබේ.
AFA සඳහන් කර ඇත්තේ මෙම තීරණවලට අදාළ සම්පූර්ණ හේතු ලබාගෙන, පසුව දඬුවම්වලට එරෙහිව අභියාචනයක් ඉදිරිපත් කිරීමට කටයුතු කරන බවයි.
