ගෑස් භාවිතයේ දී ජනතාව අනිසි බියක් ඇති කර නොගත යුතු බව ලිට්‍රෝ ගෑස් සමාගම පවසයි.
එම සමාගමේ සභාපති, තෙෂාර ජයසිංහ මහතා සඳහන් කර සිටියේ, ලිට්‍රෝ ගෑස්වල සංයුතිය පිළිබඳ කිසිදු වෙනසක් නොමැති අතර, ඒ පිළිබඳ විදේශ විශේෂඥ ආයතනවල ද නිර්දේශ ලබාගැනීමට කටයුතු කර ඇති බවත් ය.
ජනාධිපති මාධ්‍ය කේන්ද්‍රය අද (20) සංවිධාන කර තිබූ මාධ්‍ය හමුවේ දී සභාපතිවරයා මේ බව සඳහන් කළ බව නිවේදනයක් නිකුත් කරමින් ජනාධිපති මාධ්‍ය අංශය සඳහන් කරයි.
ප්‍රමිතිය හේතුවෙන් යම් හෙයකින් ගෑස් කාන්දුවීමක් හෝ පිපිරීම් වාර්තා වුවහොත් එක් පුද්ගලයෙකුට රුපියල් මිලියනයක රක්ෂණාවරණයක් ලබාදීමට ලිට්‍රෝ ගෑස් සමාගම එකඟ වී ඇති බව ද එම සමාගමේ සභාපතිවරයා පවසයි.
ගෑස්වල ප්‍රමිතිය පිළිබඳ SLS සහතිකය සහිත නිර්දේශ දැන් නිකුත් වී ඇති අතර, ද්‍රව ගෑස් සංයුතිය බියුටේන් 70%ක සහ ප්‍රොපේන් 30%ක සම්මිශ්‍රණයකි.
අද සිට “Propane Max 30% Vol” ලෙස ගෑස් සිලින්ඩරයේ මුද්‍රිතව ප්‍රදර්ශනය කිරීමට පියවර ගෙන ඇති බව ද සභාපතිවරයා මෙහිදී සඳහන් කර තිබේ.
ගෑස් උදුන් සඳහා භාවිතා කරන රෙගියුලේටරය ඇතුළු උපාංග ප්‍රමිතියෙන් තොර බවට දිවයිනේ බොහෝ ප්‍රදේශවල මේ වන විට කර ඇති පරීක්ෂණවලින් අනාවරණය වී තිබෙන බවත්, ඉදිරි මාස 03 ඇතුළත ප්‍රමිතියෙන් යුත් උපාංග ලබාගැනීමට ජනතාවට අවස්ථාව සලසා දෙමින් මතුව ඇති ගැටලුවට පූර්ණ විසඳුම් ලබාදීමට අපේක්ෂා කරන බවත් තාක්ෂණ අමාත්‍යාංශයේ ලේකම් ජයන්ත ද සිල්වා මහතා මෙහිදී සඳහන් කළේය.
ඉදිරියේ දී එම උපකරණවල ප්‍රමිතිය පිළිබඳ වගකීම ද ප්‍රධාන ගෑස් සමාගම් දෙක වෙත පැවරීමට අපේක්ෂා කරන අතර මතුව ඇති තත්ත්වය වහාම අවම මට්ටමට ගෙන ඒමට ජනාධිපතිවරයාගේ උපදෙස් පරිදි මේ වන විට සැලසුම් කර තිබෙන බවත් ලේකම්වරයා පැවසීය.
ගෑස් සිලින්ඩර් ආශ්‍රිත ගිනිගැනීම් හෝ පුපුරායාම් පිළිබඳ විමර්ශනය කිරීම හා ඒ පිළිබඳව විසඳුම් සෙවීමේ ජනාධිපති කමිටුවේ නිර්දේශ අනුව සියලු ඉදිරි පියවර ගැනීමට අපේක්ෂා කරන බව ද අමාත්‍යාංශ ලේකම්වරයා සඳහන් කළේය.
ඉදිරි උත්සව සමයේ කිසිදු අඩුවකින් තොරව ප්‍රතීතන මණ්ඩලය අනුමත කරන ලද ගෑස් වෙළෙඳපොළට නිකුත් කෙරෙන අතර ගැස් හිඟයක් පිළිබඳ කිසිදු බියක් ඇති කර නොගත යුතු බව ද ලිට්‍රෝ ගෑස් සභාපති තෙෂාර ජයසිංහ මහතා මෙහිදී සඳහන් කර තිබේ.
ගෑස් කාන්දු හා පිපිරීම් නිසා ඇති වූ සිදුවීම්වලට අදාළව හානිපූරණයට සහ අදාළ ආයතනවලට එරෙහිව නිතිමය පියවර ගන්නේ ද යන්න පිළිබඳ මාධ්‍යවේදීන් කළ විමසුමට පිළිතුරු දුන් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා සඳහන් කළේ එවැනි සිදුවීම් වූ ස්ථාන රජයේ රස පරික්ෂකවරුන් විසින් විධිමත් පරීක්ෂණවලට භාජනය කර තිබෙන බවය.
ගෑස් උදුන් සඳහා භාවිතා කරන උපාංග ප්‍රමිතියෙන් තොරවීම සහ නිවැරදි ලෙස භාවිතයට නොගැනීම හේතුවෙන් බහුතරයක් සිදුවීම් සිදුව ඇති බවට ඒ අනුව වාර්තා වී ඇති අතර, එබැවින් එම කිසිදු සිදුවීමක් සපරාධි හැඟීමකින් කළ බවට විද්‍යාත්මකව තහවුරු වී නොමැති බැවින් නඩු පැවරීමට නඩු නිමිත්තක් නැති බව දේශබන්දු තෙන්නකෝන් මහතා සඳහන් කළේය.
නිවැරදි ප්‍රමිතියෙන් යුත් ගෑස් උඳුන් සහ උපාංග වගකීම් සහිත ආයතනවලින් මිලදී ගැනීමට කටයුතු කරන ලෙස ද මෙහිදී ජනතාවගෙන් ඉල්ලීමක් කෙරිණි.
