අමාත්‍ය මණ්ඩල තීරණයට අනුව, ගැටුම්වලින් මියගිය සෑම නිලධාරියෙකු වෙනුවෙන්ම රුපියල් මිලියන 5ක වන්දි මුදලක් ගෙවනු ලැබේ. ස්ථිර ආබාධිත තත්ත්වයට පත්වූ නිලධාරීන්ට ද රුපියල් මිලියන 5 බැගින් හිමිවේ.
අර්ධ ආබාධිත තත්ත්වයට පත්වීම හේතුවෙන් ඉපැයීමේ හැකියාව සියයට 100කින් අහිමි වූ නිලධාරීන්ට රුපියල් මිලියන 4ක් ද, තාවකාලික අර්ධ ආබාධිත තත්ත්වයට පත්වූ නිලධාරීන්ට රුපියල් මිලියන 3ක් ද වන්දි වශයෙන් ගෙවීමට නියමිතය.
මෙම විශේෂ වන්දි මුදල් රාජ්‍ය පරිපාලන චක්‍රලේඛ අංක 22/93 යටතේ දැනට ලබාදෙන වන්දිවලට අමතරව ගෙවනු ලැබේ.
2026 අගෝස්තු 3 වැනිදා පැවති අමාත්‍ය මණ්ඩල රැස්වීමේදී පත්කළ කමිටුවක් ඉදිරිපත් කළ නිර්දේශ අනුව මෙම තීරණය ගෙන තිබේ. අධිකරණ හා ජාතික ඒකාබද්ධතා අමාත්‍යාංශයේ ලේකම්වරයාගේ සභාපතිත්වයෙන් යුත් එම කමිටුවට, රාජකාරියේ නිරතව සිටියදී ගැටුම්වලින් බලපෑමට ලක්වූ බන්ධනාගාර නිලධාරීන් සඳහා වන්දි සහ සහන ලබාදීම පිළිබඳ නිර්දේශ ඉදිරිපත් කිරීමේ වගකීම පවරා තිබිණි.
මේ අතර, බන්ධනාගාර උපක්‍රමික බලකාය (Prison Tactical Force) තවදුරටත් ශක්තිමත් කිරීම සඳහා ද අමාත්‍ය මණ්ඩල අනුමැතිය හිමිව තිබේ. ඒ යටතේ එම බලකායට නීතිමය පිළිගැනීමක් ලබාදීම සඳහා බන්ධනාගාර ආඥාපනත සංශෝධනය කිරීමට නියමිතය.
එමෙන්ම අවශ්‍ය සුදුසුකම් සහිත නිලධාරීන් ප්‍රමාණවත් සංඛ්‍යාවක් බඳවා ගැනීම, විශේෂිත පුහුණුව ලබාදීම, නවීන උපකරණ සැපයීම සහ බලකාය සඳහා සුදුසු ස්ථානයක වෙනම මූලස්ථානයක් පිහිටුවීම ද අනුමත කර ඇති යෝජනා අතර වේ.
කමිටුවේ නිර්දේශ මත පදනම්ව අධිකරණ හා ජාතික ඒකාබද්ධතා අමාත්‍යවරයා විසින් මෙම යෝජනා අමාත්‍ය මණ්ඩලයට ඉදිරිපත් කර තිබේ.
