සිය පෙම්වතියගේ නිවසට ගොස් සිටියදී ඉකුත් අප්‍රේල් මස 22 වනදා අතුරුදන් වූ කුලියාපිටිය ප්‍රදේශයේ පදිංචිව සිටි 31 හැවිරිදි තරුණයා ඝාතනය කර ඇති බව අනාවරණය වී තිබේ.
අතුරුදන් වූ තරුණයා ඝාතනය කර මෘත ශරීරය පුළුස්සා මාදම්පේ ප්‍රදේශයේ කැලෑබද ස්ථානයක දමා තිබියදී සොයා ගැනීමට පොලීසියට හැකි වී ඇත.
කුලියාපිටිය කබලෑව ප්‍රදේශයේ පදිංචි 31 හැවිරිදි සුසිත ජයවංශ නැමැත්තා අතුරුදන්ව ඇති බවට තොරතුරු වාර්තා වුයේ ඉකුත් අප්‍රේල් 22 වනදාය.
සුසිත ආහාරපාන වෙළෙඳසැලක් පවත්වා ගෙන යන අතර ඔහු පසුගිය අප්‍රේල් 22 වනදා සිය වෙළෙඳසැලෙහි සේවකයෙක් සමඟ කුලියාපිටිය වස්සාවුල්ල ප්‍රදේශයේ සිය පෙම්වතියගේ නිවසට ගොස් තිබු අතර එතැන් පටන් ඔහු සම්බන්ධයෙන් කිසිදු තොරතුරක් වාර්තා වී තිබුණේ නැත.
තරුණයාගේ අතුරුදන්වීම සම්බන්ධයෙන් සැකපිට සුජිත් ප්‍රනාන්දු නොහොත් ‘සිඟිති’ නැමැත්තෙක් අත්අඩංගුවට පත්වූ අතර ඔහු රුපියල් ලක්ෂ 05 බැගින් වූ ශරීර ඇප දෙකක් මත මුදා හැරීමට කුලියාපිටිය මහෙස්ත්‍රාත් අධිකරණය නියෝග කළේය.
අතුරුදන්ව ඇති තරුණයාව ඝාතනය කර ඇති බවට අනාවරණය වූ නමුත් එය සිදුකළ ආකාරය හෝ එයට සම්බන්ධ පුද්ගලයින් පිළිබඳව මෙතෙක් අනාවරණය කර ගැනීමට නොහැකි වූ බව පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා කියා සිටියේය.
